ਰਘਬੀਰ ਹੈਪੀ , ਬਰਨਾਲਾ 23 ਮਈ 2022
ਸ਼ਹਿਰ ਦੇ ਧਨੌਲਾ ਰੋਡ ਤੇ ਹਾਰਮੋਨੀ ਕਲੋਨੀ ਦੇ ਨੇੜੇ ਇੱਕ ਫੁੱਲ ਸਪੀਡ ਕਾਰ ਦੇ ਡਰਾਈਵਰ ਦੀ ਲਾਪਰਵਾਹੀ ਨੇ ਇੱਕ ਮੋਟਰਸਾਈਕਲ ਸਵਾਰ ਨੌਜਵਾਨ ਨੂੰ ਦਰੜ ਦਿੱਤਾ। ਹਾਦਸਾ ਇੰਨ੍ਹਾਂ ਦਿਲ ਕੰਬਾਊ ਸੀ ਕਿ ਆਸ ਪਾਸ ਦੇ ਕੁਝ ਲੋਕ ਵੀ ਭਿਅੰਕਰ ਹਾਦਸੇ ਦਾ ਦਰਦਨਾਕ ਮੰਜਰ ਦੇਖ ਕੇ ਕਲੇਜਾ ਫੜ੍ਹਕੇ ਬਹਿ ਗਏ। 
ਹਾਦਸੇ ਦੌਰਾਨ ਮੋਟਰਸਾਈਕਲ ਸਵਾਰ ਲਖਵਿੰਦਰ ਸਿੰਘ ਫਰਵਾਹੀ ਗੰਭੀਰ ਰੂਪ ਵਿੱਚ ਜਖਮੀ ਹੋ ਗਿਆ, ਜਿਸ ਨੂੰ ਲੋਕਾਂ ਨੇ ਬੜੀ ਮੁਸਤੈਦੀ ਨਾਲ ਸਿਵਲ ਹਸਪਤਾਲ ਦਾਖਿਲ ਕਰਵਾਇਆ। ਜਦੋਂਕਿ ਕਾਰ ਡਰਾਈਵਰ ਦੇ ਕੋਈ ਗੰਭੀਰ ਸੱਟ ਨਹੀਂ ਲੱਗੀ। 
ਹਾਦਸੇ ਵਾਲੀ ਥਾਂ ਦੇ ਚਸ਼ਮਦੀਦ ਦੱਸਦੇ ਹਨ ਕਿ ਕਾਰ ਡਰਾਈਵਰ ਬਹੁਤ ਹੀ ਤੇਜ਼ ਰਫਤਾਰ ਨਾਲ ਜਾ ਰਿਹਾ ਸੀ, ਜਿਸ ਨੇ ਬੜੀ ਲਾਪਰਵਾਹੀ ਨਾਲ ਮੋਟਰਸਾਈਕਲ ਸਵਾਰ ਨੂੰ ਟੱਕਰ ਮਾਰ ਕੇ ਦਰੜ ਦਿੱਤਾ। ਲੋਕਾਂ ਅਨੁਸਾਰ ਕਾਰ ਡਰਾਈਵਰ ਦੀ ਲਾਪਰਵਾਹੀ ਦੀ ਸਚਾਈ, ਹਾਦਸੇ ਵਾਲੀ ਥਾਂ, ਖੁਦ ਬ ਖੁਦ ਬਿਆਨ ਕਰ ਰਹੀ ਹੈ। 
ਲਾਪਰਵਾਹ ਕਾਰ ਡਰਾਈਵਰ ਨੇ ਸੜਕ ਦੇ ਡਿਵਾਈਡਰ ਅਤੇ ਟ੍ਰੀਗਾਰਡਾਂ ਦੇ ਵੀ ਪਰਖੱਚੇ ਉੱਡਾ ਦਿੱਤੇ। ਸੂਚਨਾ ਮਿਲਦਿਆਂ ਹੀ ਥਾਣਾ ਸਿਟੀ 2 ਦੀ ਪੁਲਿਸ ਨੇ ਹਾਦਸੇ ਵਾਲੀ ਥਾਂ ਪਹੁੰਚ ਕੇ ਤਹਿਕੀਕਾਤ ਸ਼ੁਰੂ ਕਰ ਦਿੱਤੀ।
