50 ਤੋਲੇ ਸੋਨਾ ਤੇ ਲੱਖਾਂ ਰੁਪਏ ਗਾਇਬ, ਜਦੋਂ ਪਤੀ ਨੇ ਸਵਾਲ ਕੀਤਾ ਤਾਂ ਮੌਤ ਬਣ ਕੇ ਆਇਆ ਪਤਨੀ ਦਾ ਪ੍ਰੇਮੀ
ਹਰਿੰਦਰ ਨਿੱਕਾ, ਪਟਿਆਲਾ 13 ਅਪ੍ਰੈਲ 2026
ਇੱਕ ਹੱਸਦਾ-ਵਸਦਾ ਪਰਿਵਾਰ ਉਸ ਸਮੇਂ ਖੂਨੀ ਅਖਾੜੇ ਵਿੱਚ ਬਦਲ ਗਿਆ ਜਦੋਂ ਪਤੀ ਨੇ ਆਪਣੀ ਪਤਨੀ ਦੇ ਨਾਜਾਇਜ਼ ਸਬੰਧਾਂ ਦਾ ਕਾਲਾ ਚਿੱਠਾ ਫੜ ਲਿਆ। ਬੁਟੀਕ ਦੀ ਆੜ ਵਿੱਚ ਚੱਲ ਰਹੇ ਇਸ ਨਾਪਾਕ ਰਿਸ਼ਤੇ ਨੇ ਨਾ ਸਿਰਫ਼ ਘਰ ਦਾ ਸੋਨਾ-ਚਾਂਦੀ ਅਤੇ ਲੱਖਾਂ ਰੁਪਏ ਲੁੱਟਿਆ, ਸਗੋਂ ਪਤੀ ਨੂੰ ਜਾਨੋਂ ਮਾਰਨ ਲਈ ਗੋਲੀਆਂ ਨਾਲ ਵੀ ਭੁੰਨ ਸੁੱਟਿਆ।
ਸੋਨਾ ਅਤੇ ਲੱਖਾਂ ਰੁਪਏ ਗਾਇਬ ਹੋਣ ਬਾਰੇ, ਪੁੱਛਿਆ ਤਾਂ ਮਿਲਿਆ ਖੂਨੀ ਜਵਾਬ
ਪੀੜਤ ਨਵਕਿਰਨ ਸਿੰਘ (ਵਾਸੀ ਮਕਾਨ ਨੰ. 10-ਏ, ਸਰਾਭਾ ਨਗਰ, ਪਟਿਆਲਾ; ਹਾਲ ਵਾਸੀ ਪਿੰਡ ਲਚਕਾਣੀ, ਥਾਣਾ ਬਖਸ਼ੀਵਾਲਾ) ਅਨੁਸਾਰ ਉਹ ਆਪਣੀ ਡਿਊਟੀ ਤੋਂ ਘਰ ਪਰਤਿਆ ਤਾਂ ਉਸਦੇ ਹੋਸ਼ ਉੱਡ ਗਏ। ਘਰ ਦੀ ਅਲਮਾਰੀ ਖੁੱਲ੍ਹੀ ਸੀ ਅਤੇ ਉਸ ਵਿੱਚੋਂ 50 ਤੋਲੇ ਸੋਨਾ ਅਤੇ 1 ਲੱਖ 50 ਹਜ਼ਾਰ ਰੁਪਏ ਦੀ ਨਕਦੀ ਗਾਇਬ ਸੀ। ਜਦੋਂ ਨਵਕਿਰਨ ਨੇ ਆਪਣੀ ਪਤਨੀ ਮਨਪ੍ਰੀਤ ਕੌਰ ਤੋਂ ਇਸ ਬਾਰੇ ਸਖ਼ਤੀ ਨਾਲ ਪੁੱਛਿਆ, ਤਾਂ ਉਹ ਸੱਚ ਮੰਨਣ ਦੀ ਬਜਾਏ ਉਲਟਾ ਬਹਿਸ ਕਰਨ ਲੱਗ ਪਈ। ਕਥਿਤ ਤੌਰ ‘ਤੇ ਆਪਣੀ ਗਲਤੀ ਲੁਕਾਉਣ ਲਈ ਉਸ ਨੇ ਤੁਰੰਤ ਆਪਣੇ ਪ੍ਰੇਮੀ, ਅਮਰਿੰਦਰ ਸਿੰਘ (ਵਾਸੀ ਸਰਾਭਾ ਨਗਰ, ਪਟਿਆਲਾ) ਨੂੰ ਫੋਨ ਕਰਕੇ ਮੌਕੇ ‘ਤੇ ਬੁਲਾ ਲਿਆ।
ਰਾਤ ਦੇ ਹਨੇਰੇ ‘ਚ ਗਲੀ ਬਣੀ ਜੰਗ ਦਾ ਮੈਦਾਨ
ਪੀੜਤ ਮੁਤਾਬਿਕ ਰਾਤ ਦੇ ਕਰੀਬ 9:40 ਵਜੇ ਅਮਰਿੰਦਰ ਸਿੰਘ ਆਪਣੀ ਗੱਡੀ ਵਿੱਚ ਸਵਾਰ ਹੋ ਕੇ ਉਸ ਦੇ ਘਰ ਅੱਗੇ ਪਹੁੰਚਿਆ। ਗਲੀ ਵਿੱਚ ਖੜ੍ਹੇ ਨਵਕਿਰਨ ਨੂੰ ਦੇਖਦਿਆਂ ਹੀ ਦੋਸ਼ੀ ਨੇ ਗਾਲੀ-ਗਲੋਚ ਸ਼ੁਰੂ ਕਰ ਦਿੱਤਾ। ਮਾਮਲਾ ਇੰਨਾ ਭਖ ਗਿਆ ਕਿ ਅਮਰਿੰਦਰ ਸਿੰਘ ਨੇ ਜਾਨ ਲੈਣ ਦੀ ਨੀਯਤ ਨਾਲ ਆਪਣੇ ਹੱਥ ਵਿੱਚ ਫੜੇ ਪਿਸਤੌਲ ਨਾਲ ਨਵਕਿਰਨ ‘ਤੇ ਸਿੱਧੀ ਗੋਲੀ ਚਲਾ ਦਿੱਤੀ, ਜੋ ਉਸ ਦੇ ਖੱਬੇ ਮੋਢੇ ਵਿੱਚ ਜਾ ਲੱਗੀ। ਇੰਨਾ ਹੀ ਨਹੀਂ, ਦਰਿੰਦਗੀ ਦੀ ਹੱਦ ਪਾਰ ਕਰਦਿਆਂ ਦੋਸ਼ੀ ਨੇ ਨਵਕਿਰਨ ਦੇ ਸਿਰ ‘ਤੇ ਪਿਸਤੌਲ ਦਾ ਬੱਟ ਮਾਰ ਕੇ ਉਸ ਨੂੰ ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਕਰ ਦਿੱਤਾ।
ਮੌਤ ਦੇ ਮੂੰਹ ‘ਚੋਂ ਨਿਕਲਿਆ ਪੀੜਤ, ਪੁਲਿਸ ਨੇ ਕਸਿਆ ਸ਼ਿਕੰਜਾ
ਰੌਲਾ ਪੈਣ ‘ਤੇ ਦੋਸ਼ੀ ਅਮਰਿੰਦਰ ਸਿੰਘ ਮੌਕੇ ਤੋਂ ਫਰਾਰ ਹੋ ਗਿਆ। ਗੰਭੀਰ ਜ਼ਖ਼ਮੀ ਹਾਲਤ ਵਿੱਚ ਨਵਕਿਰਨ ਨੂੰ ਤੁਰੰਤ ਮਨੀਪਾਲ ਹਸਪਤਾਲ, ਪਟਿਆਲਾ ਵਿਖੇ ਭਰਤੀ ਕਰਵਾਇਆ ਗਿਆ। ਥਾਣਾ ਬਖਸ਼ੀਵਾਲਾ ਦੀ ਪੁਲਿਸ ਨੇ ਜ਼ਖ਼ਮੀ ਨਵਕਿਰਨ ਸਿੰਘ ਦੇ ਬਿਆਨ ਅਤੇ ਮੈਡੀਕਲ ਰਿਪੋਰਟ ਦੇ ਆਧਾਰ ਉੱਤੇ ਦੋਸ਼ੀ ਪਤਨੀ ਅਤੇ ਉਸ ਦੇ ਪ੍ਰੇਮੀ ਖਿਲਾਫ FIR ਨੰ. 38, ਮਿਤੀ 12-04-26, ਅਧੀਨ ਧਾਰਾ 109, 3(5) BNS ਅਤੇ ਅਸਲਾ ਐਕਟ ਦੀਆਂ ਸਖ਼ਤ ਧਾਰਾਵਾਂ ਤਹਿਤ ਮੁਕੱਦਮਾ ਦਰਜ ਕਰ ਲਿਆ ਹੈ। ਪੁਲਿਸ ਹੁਣ ਇਸ ਲੁੱਟ ਅਤੇ ਹਮਲੇ ਦੀ ਡੂੰਘਾਈ ਨਾਲ ਜਾਂਚ ਕਰ ਰਹੀ ਹੈ ਅਤੇ ਦੋਸ਼ੀਆਂ ਦੀ ਗ੍ਰਿਫ਼ਤਾਰੀ ਲਈ ਛਾਪੇਮਾਰੀ ਜਾਰੀ ਹੈ।
