ਰਘਵੀਰ ਹੈਪੀ , ਬਰਨਾਲਾ 16 ਫਰਵਰੀ 2021
ਬੀਤੀ ਰਾਤ ਕਰੀਬ 8 ਵਜੇ ਸ਼ਹਿਰ ਦੇ ਪੱਕਾ ਕਾਲਜ ਰੋਡ ‘ਤੇ ਉਸ ਸਮੇਂ ਭਗਦੜ ਮਚ ਗਈ ,ਜਦੋਂ ਇੱਕ ਖੜੀ ਗੱਡੀ ਨੂੰ ਅੱਗ ਦੀਆਂ ਲਾਟਾਂ ਨੇ ਘੇਰ ਲਿਆ। ਗੱਡੀ ਨੂੰ ਅੱਗ ਦੀਆਂ ਲਾਟਾਂ ਵਿੱਚ ਘਿਰੀ ਦੇਖਦਿਆਂ ਹੀ ਇਲਾਕੇ ਦੇ ਲੋਕਾਂ ਨੇ ਅੱਗ ਬੁਝਾਉਣ ਲਈ ਯਤਨ ਸ਼ੁਰੂ ਕਰ ਦਿੱਤੇ। ਨਜਦੀਕੀ ਲੋਕਾਂ ਦਾ ਕਹਿਣਾ ਹੈ ਕਿ ਫਾਇਰ ਬ੍ਰਿਗੇਡ ਨੂੰ ਸੂਚਨਾ ਦੇਣ ਤੇ ਵੀ ਕੋਈ ਫਾਇਰ ਕਰਮਚਾਰੀ ਮੌਕੇ ਤੇ ਨਹੀਂ ਪਹੁੰਚਿਆ। ਆਖਿਰ ਲੋਕਾਂ ਨੇ ਖੁਦ ਹੀ ਬਾਲਟੀਆਂ ਨਾਲ ਅੱਗ ਤੇ ਕਾਬੂ ਪਾਇਆ। ਉੱਧਰ ਫਾਇਰ ਬ੍ਰਿਗੇਡ ਦੇ ਕਰਮਚਾਰੀਆਂ ਨੇ ਪੁੱਛਣ ਤੇ ਦੱਸਿਆ ਕਿ ਗੱਡੀ ਨੂੰ ਅੱਗ ਲੱਗਣ ਦੀ ਘਟਨਾ ਬਾਰੇ ਕਿਸੇ ਨੇ ਫਾਇਰ ਬ੍ਰਿਗੇਡ ਨੂੰ ਸੂਚਨਾ ਹੀ ਨਹੀਂ ਦਿੱਤੀ। ਅਗਰ ਸੂਚਨਾ ਮਿਲੀ ਹੁੰਦੀ ਤਾਂ ਤੁਰੰਤ ਹੀ ਫਾਇਰ ਕਰਮਚਾਰੀ ਮੌਕੇ ਤੇ ਜਰੂਰ ਪਹੁੰਚਦੇ। ਘਟਨਾ ਵਾਲੀ ਥਾਂ ਦੇ ਨੇੜੇ ਖੜ੍ਹੇ ਲੋਕਾਂ ਅਨੁਸਾਰ ਗੱਡੀ ਕਿਸ ਵਿਅਕਤੀ ਦੀ ਸੀ ਅਤੇ ਅੱਗ ਕਿਵੇਂ ਲੱਗੀ,ਇਸ ਬਾਰੇ ਕੋਈ ਜਾਣਕਾਰੀ ਮੌਕੇ ਤੇ ਨਹੀਂ ਮਿਲ ਸਕਦੀ। 
