ਦੋਵਾਂ ਔਰਤਾਂ ਦੀ ਮੌਤ ਕ੍ਰਮਾਨੁਸਾਰ ਪਟਿਆਲਾ ਤੇ ਲੁਧਿਆਣਾ ਚ, ਹੋਈ
ਹਰਿੰਦਰ ਨਿੱਕਾ ਬਰਨਾਲਾ 30 ਜੁਲਾਈ 2020
ਜਿਲ੍ਹੇ ਅੰਦਰ ਕੋਰੋਨਾ ਵਾਇਰਸ ਦੇ ਪੌਜੇਟਿਵ ਮਰੀਜ਼ਾਂ ਦਾ ਅੰਕੜਾ ਲਗਾਤਾਰ ਵੱਧਦਾ ਹੋਣ ਕਾਰਣ ਲੋਕਾਂ ਲਈ ਖਤਰਾ ਵੀ ਹਰ ਦਿਨ ਵੱਧਦਾ ਹੀ ਜਾ ਰਿਹਾ ਹੈ। ਜਿਲ੍ਹੇ ਦੀਆਂ ਰਹਿਣ ਵਾਲੀਆਂ 2 ਕੋਰੋਨਾ ਪੌਜੇਟਿਵ ਮਰੀਜ਼ ਔਰਤਾਂ ਦੀ ਮੌਤ ਵੀ ਹੋ ਗਈ। ਜਦੋਂ ਕਿ ਜਿਲ੍ਹੇ ਦੇ 11 ਹੋਰ ਮਰੀਜ਼ਾ ਦੀ ਰਿਪੋਰਟ ਵੀ ਪੌਜੇਟਿਵ ਆਈ ਹੈ। ਮ੍ਰਿਤਕ ਔਰਤਾਂ ਵਿੱਚੋਂ ਇੱਕ ਮਹਿਲ ਕਲਾਂ ਬਲਾਕ ਦੇ ਪਿੰਡ ਲੋਹਗੜ ਦੀ ਰਹਿਣ ਵਾਲੀ ਕਰੀਬ 52 ਵਰ੍ਹਿਆਂ ਦੀ ਪਰਮਜੀਤ ਕੌਰ ਹੈ। ਜਿਹੜੀ ਰਾਏਕੋਟ ਤਹਿਸੀਲ ਦੇ ਪਿੰਡ ਕਾਲਸਾਂ ਦੇ ਪ੍ਰਾਇਮਰੀ ਹੈਲਥ ਸੈਂਟਰ ਚ, ਬਤੌਰ ਏ.ਐਨ.ਐਮ. ਡਿਊਟੀ ਤੇ ਤਾਇਨਾਤ ਸੀ। ਜਦੋਂ ਦੂਸਰੀ ਕੋਰੋਨਾ ਪੌਜੇਟਿਵ ਮ੍ਰਿਤਕ ਔਰਤ ਅੰਗਰੇਜ ਕੌਰ ਉਮਰ ਕਰੀਬ 65 ਸਾਲ ਪਤਨੀ ਗੁਲਜਾਰ ਸਿੰਘ ਬਲਾਕ ਧਨੌਲਾ ਦੇ ਪਿੰਡ ਉੱਪਲੀ ਦੀ ਰਹਿਣ ਵਾਲੀ ਹੈ।
ਸਿਹਤ ਵਿਭਾਗ ਮਹਿਲ ਕਲਾਂ ਅਤੇ ਧਨੌਲਾ ਦੇ ਅਧਿਕਾਰੀਆਂ ਅਨੁਸਾਰ ਸਿਹਤ ਵਿਭਾਗ ਦੀਆਂ ਟੀਮਾਂ ਨੇ ਕੋਵਿਡ 19 ਦੇ ਇਹਤਿਆਤੀ ਨਿਯਮਾਂ ਅਨੁਸਾਰ ਅੰਤਿਮ ਸੰਸਕਾਰ ਵੀ ਦੇਰ ਸ਼ਾਮ ਕਰ ਦਿੱਤਾ ਗਿਆ ਹੈ। ਉੱਧਰ ਸਿਵਲ ਸਰਜ਼ਨ ਡਾਕਟਰ ਗੁਰਿੰਦਰਬੀਰ ਸਿੰਘ ਨੇ ਪੁੱਛਣ ਤੇ ਕਿਹਾ ਕਿ ਦੋਵਾਂ ਔਰਤਾਂ ਦੀ ਮੌਤ ਸਬੰਧੀ ਹਾਲੇ ਅਧਿਕਾਰਿਤ ਤੌਰ ਤੇ ਕੋਈ ਸੂਚਨਾ ਉਨਾਂ ਕੋਲ ਨਹੀਂ ਪਹੁੰਚੀ। ਕਿਉਂਕਿ ਦੋਵੇਂ ਔਰਤਾਂ ਦਾ ਇਲਾਜ਼ ਕ੍ਰਮਾਨੁਸਾਰ ਰਜਿੰਦਰਾ ਹਸਪਤਾਲ ਪਟਿਆਲਾ ਅਤੇ ਡੀਐਮਸੀ ਲੁਧਿਆਣਾ ਵਿਖੇ ਚੱਲ ਰਿਹਾ ਸੀ। ਉਨਾਂ ਕਿਹਾ ਕਿ ਇਸੇ ਕਾਰਣ ਹੀ ਹਾਲੇ ਤੱਕ ਇੱਨ੍ਹਾਂ ਦੀ ਕੋਈ ਕੰਨਟੈਕਟ ਹਿਸਟਰੀ ਦਾ ਪੂਰਾ ਪਤਾ ਨਹੀਂ ਲੱਗ ਸਕਿਆ। ਸ਼ੁਕਰਵਾਰ ਸਵੇਰ ਤੱਕ ਇੱਨਾਂ ਦੋਵਾਂ ਔਰਤਾਂ ਬਾਰੇ ਜਾਣਕਾਰੀ ਉਪਲੱਭਧ ਹੋ ਜਾਵੇਗੀ।
ਸਿਵਲ ਸਰਜਨ ਨੇ ਦੱਸਿਆ ਕਿ ਵੀਰਵਾਰ ਨੂੰ ਪ੍ਰਾਪਤ ਰਿਪੋਰਟ ਚ, ਵੀ ਜਿਲ੍ਹੇ ਦੇ 11 ਜਣਿਆਂ ਦੀ ਰਿਪੋਰਟ ਪੌਜੇਟਿਵ ਆਈ ਹੈ। ਇੱਨਾਂ ਚ, ਜਿਲ੍ਹਾ ਜੇਲ੍ਹ ਦੇ ਬੰਦੀ ਮੁਹੰਮਦ ਨਸੀਮ ਤੋਂ ਇਲਾਵਾ 2 ਜਣੇ ਸੰਘੇੜਾ,ਸ਼ਹਿਣਾ,ਤਪਾ ਤੇ ਰਾਜੀਆ ਦਾ 1/1/1 , ਬਰਨਾਲਾ ਸ਼ਹਿਰ ਦੀ ਆਸਥਾ ਕਲੋਨੀ ਅਤੇ ਐਸਏਐਸ ਨਗਰ ਦਾ 1/1 ਮਰੀਜ਼ ਵੀ ਸ਼ਾਮਿਲ ਹੈ। ਪੌਜੇਟਿਵ ਮਰੀਜਾਂ ਚ, 2 ਔਰਤਾਂ ਵੀ ਸ਼ਾਮਿਲ ਹਨ।
