ਝਰੋਖੇ ‘ਚੋਂ ਝਾਤੀ-1 … ਮੀਤ ਹੇਅਰ, ਲੋਕ ਸਭਾ ਚੋਣ ਜਿੱਤ ਕੇ ਦੁਹਰਾ ਸਕਦੈ, ਇਤਿਹਾਸ….!

       ਲੋਕ ਸਭਾ ਹਲਕਾ ਸੰਗਰੂਰ ਦੇ ਲੋਕ, ਆਪਣੇ ਸੁਭਾਅ ਦੀ ਵਿਲੱਖਣਤਾ ਕਰਕੇ ਹੀ ਪ੍ਰਸਿੱਧ ਹਨ। ਕੋਈ ਫੰਨੇ ਖਾਂ ਲੀਡਰ ਵੀ ਹਲਕੇ ਦੇ ਲੋਕਾਂ ਦੀ ਨਬਜ਼ ਨੂੰ ਸਹੀ ਢੰਗ ਨਾਲ ਟੋਹ ਨਹੀਂ ਸਕਿਆ। ਹਲਕੇ ਦੇ ਲੋਕਾਂ ਦਾ ਅਰਸ਼ ਤੋਂ ਫਰਸ਼ ‘ਤੇ ਫਰਸ਼ ਤੋਂ ਅਰਸ਼ ਤੱਕ ਪਹੁੰਚਾਉਣ ਦਾ ਵੱਖਰਾ ਹੀ ਇਤਿਹਾਸ ਹੈ। ਜਿਆਦਾਤਰ ਮੌਕਿਆਂ ਤੇ ਇੱਥੋਂ ਦੇ ਲੋਕਾਂ ਦੀ ਸੁਰ ਬਗਾਵਤੀ ਹੀ ਰਹੀ ਹੈ। ਪਤਾ ਹੀ ਨਹੀਂ, ਲੱਗਦਾ ਕਦੋਂ ਤੇ ਕਿਹੜੇ ਲੀਡਰ ਨੂੰ ਪਟਖਣੀ ਦੇਣ ਦਾ ਮਨ ਬਣਾ ਲੈਂਦੇ ਹਨ। ਚੋਣ ਇਤਿਹਾਸ ਦੇ ਝਰੋਖਿਆਂ ਵਿੱਚ ਝਾਤੀ ਮਾਰਦਿਆਂ ਪਤਾ ਲੱਗਦਾ ਹੈ ਕਿ ਇੱਥੋਂ ਦੇ ਲੋਕਾਂ ਨੇ ਹਰ ਲਹਿਰ ਨੂੰ ਪ੍ਰਵਾਨ ਚੜ੍ਹਾਇਆ ਹੈ। ਲੋਕ ਸਭਾ ਹਲਕੇ ਦੀ ਨੁਮਾਇੰਦਗੀ ਹੁਣ ਤੱਕ ਕਾਮਰੇਡਾਂ ਤੋਂ ਲੈ ਕੇ, ਨਰਮ ਅਤੇ ਗਰਮ ਦਲੀਏ ਅਕਾਲੀਆਂ ਸਣੇ, ਕਾਂਗਰਸੀ ਅਤੇ ਲਾਲ -ਨੀਲੇ ਅਤੇ ਬਸੰਤੀ ਰੰਗ ਵਿੱਚ ਰੰਗੀ, ਮਿਲਗੋਭਾ ਸੋਚ ਵਾਲੀ ਆਮ ਆਦਮੀ ਪਾਰਟੀ ਵਾਲਿਆਂ ਨੇ ਵੀ ਕੀਤੀ ਹੈ। ਕਈ ਵਾਰ ਇੱਥੋਂ ਦੇ ਲੋਕ, ਪੰਜਾਬ ਹੀ ਨਹੀਂ, ਪੂਰੇ ਦੇਸ਼ ਤੋਂ ਵੱਖਰੀ ਹੀ ਚੋਣ ਕਰਕੇ, ਸਾਰਿਆਂ ਨੂੰ ਮੂੰਹ ਵਿੱਚ ਉਂਗਲਾਂ ਪਾ ਕੇ,ਸੋਚਣ ਲਈ ਮਜਬੂਰ ਕਰਨ ਵਾਲਾ ਫਤਵਾ ਵੀ ਸੁਣਾਉਂਦੇ ਰਹੇ ਹਨ। 1952 ਤੋਂ ਲੈ ਕੇ ਹੁਣ ਤੱਕ 4 ਵਾਰ ਅਕਾਲੀ ਦਲ, 4 ਵਾਰ ਕਾਂਗਰਸ, ਦੋ ਵਾਰ ਸੀ.ਪੀ.ਆਈ. , ਇੱਕ ਵਾਰ ਅਕਾਲੀ ਦਲ ਸੰਤ ਫਤਿਹ ਸਿੰਘ, ਇੱਕ ਵਾਰ ਅਕਾਲੀ ਦਲ ਬਾਬਾ, ਦੋ – ਦੋ ਵਾਰ ਸ੍ਰੋਮਣੀ ਅਕਾਲੀ ਦਲ ਅਮ੍ਰਿਤਸਰ ਅਤੇ ਆਮ ਆਦਮੀ ਪਾਰਟੀ ਨੇ ਲੋਕ ਸਭਾ ਹਲਕੇ ਦੀ ਨੁਮਾਇੰਦਗੀ ਕੀਤੀ ਹੈ। 

       ਕੈਬਨਿਟ ਮੰਤਰੀ ਗੁਰਮੀਤ ਸਿੰਘ ਮੀਤ ਹੇਅਰ ਦੇ ਨਾਂ ਪਹਿਲਾਂ ਵੀ ਚੋਣ ਇਤਿਹਾਸ ਨੂੰ ਤੋੜਣ ਅਤੇ ਬਣਾਉਣ ਦਾ ਰਿਕਾਰਡ ਦਰਜ ਹੋ ਚੁੱਕਾ ਹੈ ।  ਬਰਨਾਲਾ ਵਿਧਾਨ ਸਭਾ ਚੋਣਾਂ ਦਾ ਲੰਬਾ ਅਰਸਾ ਪੁਰਾਣਾ ਇਹ ਰਿਕਾਰਡ ਚੱਲਿਆ ਆਉਂਦਾ ਸੀ ਕਿ ਇਸ ਸੀਟ ਤੋਂ ਜਿੱਤਣ ਵਾਲਾ ਵਿਧਾਇਕ ਸਾਲ 1992 ਤੋਂ ਬਾਅਦ ਸੱਤਾ ਧਿਰ ਵਿੱਚ ਨਹੀਂ ਸੀ ਬੈਠ ਸਕਿਆ । ਲੋਕਾਂ ਨੂੰ ਅਕਸਰ ਗਿਲਾ ਰਹਿੰਦਾ ਸੀ ਕਿ ਜਿਹੜੀ ਧਿਰ ਦੀ ਸਰਕਾਰ ਪੰਜਾਬ ਵਿੱਚ ਬਣਦੀ ਹੈ, ਉਸ ਪਾਰਟੀ ਦੇ ਉਮੀਦਵਾਰ ਨੂੰ ਇਲਾਕੇ ਦੇ ਲੋਕ ਹਰਾ ਦਿੰਦੇ ਹਨ। ਅਜਿਹਾ ਹੋਣਾ 1997 ਤੋਂ ਸ਼ੁਰੂ ਹੋਇਆ, ਜਦੋਂ ਸਰਕਾਰ ਅਕਾਲੀ ਭਾਜਪਾ ਗੱਠਜੋੜ ਦੀ ਬਣੀ ਤਾਂ ਬਰਨਾਲਾ ਹਲਕੇ ਦੇ ਲੋਕਾਂ ਨੇ ਅਜਾਦ ਤੌਰ ਤੇ ਮਲਕੀਤ ਸਿੰਘ ਕੀਤੂ ਨੂੰ ਵਿਧਾਇਕ ਚੁਣਿਆ। ਫਿਰ ਉਹ ਦੂਜੀ ਵਾਰ 2002 ਵਿੱਚ ਵਿਧਾਇਕ ਬਣੇ ਤਾਂ ਸਰਕਾਰ ਕਾਂਗਰਸ ਪਾਰਟੀ ਦੀ ਬਣ ਗਈ। 2007 ਅਤੇ 2012 ਵਿੱਚ ਬਰਨਾਲਾ ਹਲਕੇ ਦੇ ਲੋਕਾਂ ਨੇ ਕੇਵਲ ਸਿੰਘ ਢਿੱਲੋਂ ਨੂੰ ਦੋ ਵਾਰ ਵਿਧਾਇਕ ਚੁਣਿਆ ਤਾਂ ਸੂਬੇ ਵਿੱਚ ਸਰਕਾਰ ਅਕਾਲੀ ਭਾਜਪਾ ਗੱਠਜੋੜ ਦੀ ਬਣ ਗਈ। ਫਿਰ 2017 ਵਿੱਚ ਸਰਕਾਰ ਕਾਂਗਰਸ ਦੀ ਬਣੀ, ਪਰੰਤੂ ਹਲਕੇ ਦੇ ਲੋਕਾਂ ਨੇ ਆਮ ਆਦਮੀ ਪਾਰਟੀ ਦੇ ਉਮੀਦਵਾਰ ਗੁਰਮੀਤ ਸਿੰਘ ਮੀਤ ਹੇਅਰ ਨੂੰ ਵਿਧਾਇਕ ਚੁਣ ਲਿਆ।                                                             ਹੁਣ ਹਾਲੀਆ ਲੰਘੀਆਂ ਵਿਧਾਨ ਸਭਾ ਚੋਣਾਂ 2022 ਸਮੇਂ ਲੋਕ ਪੁਰਾਣਾ ਇਤਿਹਾਸ ਦੁਹਰਾਏ ਜਾਣ ਦੀ ਉਮੀਦ ਲਾ ਕੇ, ਇੱਥੋਂ ਮੀਤ ਹੇਅਰ ਦੀ ਹਾਰ ਬਾਰੇ ਕਿਆਸ ਅਰਾਈਆਂ ਲਗਾਉਂਦੇ ਰਹੇ, ਪਰ ਮੀਤ ਹੇਅਰ ਨੇ,ਇਨ੍ਹਾਂ ਕਿਆਸ ਅਰਾਈਆਂ ਨੂੰ ਦਰਕਿਨਾਰ ਕਰਕੇ, 25 ਵਰ੍ਹਿਆਂ ਦਾ ਇਤਿਹਾਸ ਤੋੜਕੇ, ਨਵਾਂ ਹੀ ਇਤਿਹਾਸ ਆਪਣੇ ਨਾਂ ਕਰ ਲਿਆ। ਯਾਨੀ ਉਹ ਸਰਕਾਰੀ ਧਿਰ ਦੇ ਨੁਮਾਇੰਦੇ ਹੀ ਨਹੀਂ,ਸਗੋਂ ਕੈਬਨਿਟ ਵਿੱਚ ਥਾਂ ਵੀ ਬਣਾਉਣ ਵਿੱਚ ਸਫਲ ਹੋ ਗਏ। ਹੁਣ ਫਿਰ ਲੋਕਾਂ ਦੀਆਂ ਨਜ਼ਰਾਂ ਮੀਤ ਹੇਅਰ ਦੀ ਲੋਕ ਸਭਾ ਚੋਣ ‘ਚ ਕਾਰਗੁਜਾਰੀ  ਤੇ ਟਿਕੀਆਂ ਹੋਈਆਂ ਹਨ ਕਿ ਉਹ 28 ਵਰ੍ਹਿਆਂ ਦੇ ਪੁਰਾਣੇ ਰਿਕਾਰਡ ਨੂੰ ਤੋੜ ਕੇ, ਲੋਕ ਸਭਾ ਦੀਆਂ ਪੌੜੀਆਂ ਚੜ੍ਹ ਸਕਣਗੇ…!  

           ਕਾਂਗਰਸ ਪਾਰਟੀ ਦੀ ਸਰਕਾਰ ਦੇ 1992 ਤੋਂ 1997 ਤੱਕ ਦੇ ਕਾਰਜਕਾਲ ਦੌਰਾਨ ਹੋਈਆਂ ਲੋਕ ਸਭਾ ਚੋਣਾਂ ਸਾਲ 1996 ਵਿੱਚ ਹੋਈਆਂ। ਇਸ ਚੋਣ ਵਿੱਚ ਲੋਕਾਂ ਨੇ ਸਰਕਾਰ ਵਿਰੋਧੀ ਰੁਖ ਅਪਣਾਉਂਦਿਆਂ, ਅਕਾਲੀ ਉਮੀਦਵਾਰ ਸੁਰਜੀਤ ਸਿੰਘ ਬਰਨਾਲਾ ਦੇ ਹੱਕ ਵਿੱਚ ਫਤਵਾ ਦਿੱਤਾ।