ਸੰਘਣੀ ਅਬਾਦੀ ‘ਚ ਮੋਬਾਇਲ ਟਾਵਰ ਤੋਂ ਭੜ੍ਹਕੇ ਲੋਕ, ਲੋਕਾਂ ਦੇ ਹੱਕ ਵਿੱਚ ਨਿੱਤਰੀ ਕਿਸਾਨ ਯੂਨੀਅਨ

ਜੌੜੀਆਂ-ਚੱਕੀਆਂ ਮੁਹੱਲਾ ਬਰਨਾਲਾ ਵਿੱਚ ਭਾਕਿਯੂ ਏਕਤਾ (ਡਕੌਂਦਾ) ਟਾਵਰ ਲਾਉਣ ਦੀ ਇਜਾਜ਼ਤ ਨਹੀਂ ਦੇਵੇਗੀ – ਹਰਮੰਡਲ ਜੋਧਪੁਰ

ਪਲੇਅ ਵੇਅ ਸਕੂਲ ਦੀ ਛੱਤ ਉੱਪਰ ਲੱਗ ਰਹੇ ਏਅਰਟੈੱਲ ਦਾ ਟਾਵਰ ਬੱਚਿਆਂ/ ਮੁਹੱਲਾ ਨਿਵਾਸੀਆਂ ਦੀ ਸਿਹਤ ਉੱਪਰ ਪਾਊ ਮਾੜਾ ਪ੍ਰਭਾਵ – ਰਜਿੰਦਰ ਪਾਲ 

           ਜੌੜੀਆਂ ਚੱਕੀਆਂ ਮੁਹੱਲਾ ਸ਼ਹਿਰ ਬਰਨਾਲਾ ਦੇ ਘੁੱਗ ਵਸਦੀ ਵਸੋਂ ਵਿੱਚ ਵਪਾਰਕ ਘਰਾਣੇ ਅੰਨ੍ਹੇ ਮੁਨਾਫ਼ੇ ਦੀ ਹੋੜ ਵਿੱਚ ਜ਼ਿੰਦਗੀ ਨੂੰ ਦਾਅ ਤੇ  ਲਾ ਰਹੇ ਹਨ। ਇਸ ਦੀ ਮਿਸਾਲ ਹੈ ਕਿ ਏਅਰਟੈੱਲ ਕੰਪਨੀ ਇੱਕ ਪਲੇਅ ਵੇਅ ਸਕੂਲ ਦੀ ਛੱਤ ਉੱਪਰ ਮੁਹੱਲਾ ਨਿਵਾਸੀਆਂ ਦੇ ਇਤਰਾਜ ਅੱਖੋਂ-ਪਰੋਖੇ ਕਰਕੇ ਅਤੇ ਸਾਰੇ ਕਾਇਦੇ ਕਾਨੂੰਨਾਂ ਨੂੰ ਛਿੱਕੇ ਟੰਗ ਲਾਏ ਗਏ ਮੋਬਾਈਲ ਟਾਵਰ ਲੋਕਾਈ ਦੀ ਜਾਨ ਦਾ ਖੌਅ ਬਣ ਰਹੇ ਹਨ। ਜੌੜੀਆਂ-ਚੱਕੀਆਂ ਮੁਹੱਲੇ ਵਿੱਚ ਭਾਰਤ ਭੂਸ਼ਨ ਨਾਂ ਦੇ ਵਿਅਕਤੀ ਵੱਲੋਂ ਲਾਏ ਜਾ ਰਹੇ ਮੋਬਾਈਲ ਟਾਵਰ , ਮੁਹੱਲਾ ਨਿਵਾਸੀਆਂ ਦੇ ਵਿਰੋਧ ਕਰਨ ਦੇ ਬਾਵਜੂਦ ਵੀ  ਰੁਕਣ ਦਾ ਨਾਂ ਨਹੀਂ ਸੀ ਲੈ ਰਿਹਾ। ਹਾਲਾਂ ਕਿ ਮੁਹੱਲਾ ਨਿਵਾਸੀਆਂ ਨੇ ਆਪਣੀ ਇਹ ਸਮੱਸਿਆ ਪੁਲਿਸ ਅਤੇ ਕੈਬਨਿਟ ਮੰਤਰੀ ਮੀਤ ਹੇਅਰ ਦੇ ਵੀ ਲਿਖਤੀ ਰੂਪ ਵਿੱਚ ਧਿਆਨ ਵਿੱਚ ਲਿਆਂਦੀ ਸੀ। ਪਰ ਪਰਨਾਲਾ ਉਥੇ ਦਾ ਉਥੇ ਹੀ ਰਿਹਾ। ਪੀੜਤ ਲੋਕਾਂ ਵੱਲੋਂ ਆਪਣੀ ਇਹ ਸਮੱਸਿਆ ਭਾਕਿਯੂ ਏਕਤਾ (ਡਕੌਂਦਾ) ਦੇ ਸੰਧੂ ਪੱਤੀ ਬਰਨਾਲਾ ਇਕਾਈ ਦੇ ਪ੍ਰਧਾਨ ਗਮਦੂਰ ਸਿੰਘ ਦੇ ਧਿਆਨ ਵਿੱਚ ਲਿਆਂਦੀ ਗਈ । ਇਕਾਈ ਆਗੂਆਂ ਨੇ ਇਸ ਗੈਰਕਾਨੂੰਨੀ ਮੋਬਾਈਲ ਟਾਵਰ ਰੋਕਣ ਲਈ ਇਨਕਲਾਬੀ ਕੇਂਦਰ ਪੰਜਾਬ ਦੇ ਆਗੂਆਂ ਦੇ ਸਹਿਯੋਗ ਨਾਲ ਮੁਹੱਲਾ ਨਿਵਾਸੀਆਂ ਦਾ ਇਕੱਠ ਜ਼ਿਲ੍ਹਾ ਸੀਨੀਅਰ ਮੀਤ ਪ੍ਰਧਾਨ ਹਰਮੰਡਲ ਸਿੰਘ ਜੋਧਪੁਰ ਦੀ ਅਗਵਾਈ ਵਿੱਚ ਕੀਤਾ।

        ਇਸ ਮੌਕੇ ਭਰਵੇਂ ਇਕੱਠ ਨੂੰ ਸੰਬੋਧਨ ਕਰਦਿਆਂ ਬਰਨਾਲਾ ਬਲਾਕ ਦੇ ਆਗੂ ਸਤਨਾਮ ਸਿੰਘ ਬਰਨਾਲਾ, ਬਲਵੰਤ ਸਿੰਘ ਠੀਕਰੀਵਾਲਾ, ਹਰਪਾਲ ਸਿੰਘ ਹੰਢਿਆਇਆ ਅਤੇ ਡਾ ਰਜਿੰਦਰ ਪਾਲ ਨੇ ਮੋਬਾਇਲ ਟਾਵਰ ਦੇ ਵਸੋਂ ਵਿੱਚ ਲੱਗਣ ਨਾਲ ਮਨੁੱਖੀ ਸਿਹਤ ਉੱਤੇ ਪੈਣ ਵਾਲੇ ਪ੍ਰਭਾਵਾਂ ਤੋਂ ਲੋਕਾਂ ਨੂੰ ਜਾਣੂ ਕਰਵਾਇਆ। ਆਗੂਆਂ ਨੇ ਮੁਹੱਲਾ ਨਿਵਾਸੀਆਂ ਨੂੰ ਇਸ ਧੱਕੇਸ਼ਾਹੀ ਦਾ ਜਥੇਬੰਦਕ ਢੰਗ ਨਾਲ ਵਿਰੋਧ ਕਰਨ ਦਾ ਸੱਦਾ ਦਿੱਤਾ। ਇਕੱਠੇ ਹੋਏ ਲੋਕਾਂ ਨੇ ਫ਼ੈਸਲਾ ਕੀਤਾ ਕਿ ਲੋਕਾਂ ਦੀ ਜ਼ਿੰਦਗੀ ਨਾਲ ਖਿਲਵਾੜ ਕਰਨ ਦੀ ਕਿਸੇ ਵਪਾਰਕ ਘਰਾਣੇ ਨੂੰ ਇਜਾਜ਼ਤ ਨਹੀਂ ਦਿੱਤੀ ਜਾਵੇਗੀ। ਆਗੂਆਂ ਨੇ ਟਾਵਰ ਦੀ ਉਸਾਰੀ ਕਰਵਾ ਰਹੇ ਮਾਲਕ ਨੂੰ ਆਪਣੇ ਸੌੜੇ ਮੁਨਾਫ਼ਿਆਂ ਲਈ ਉਸਾਰੇ ਜਾ ਰਹੇ ਟਾਵਰ ਨੂੰ ਰੋਕਣ ਦੀ ਚਿਤਾਵਨੀ ਦਿੱਤੀ। ਭਾਰੀ ਲੋਕ ਰੋਹ ਦੇ ਚਲਦਿਆਂ ਭਾਵੇਂ ਇੱਕ ਵਾਰ ਟਾਵਰ ਉਸਾਰੀ ਦਾ ਕੰਮ ਰੋਕ ਦਿੱਤਾ ਗਿਆ ਹੈ। ਪਰ ਆਉਣ ਵਾਲੇ ਸਮੇਂ ਵਿੱਚ ਜੇਕਰ ਅਜਿਹੀ ਹਰਕਤ ਕੀਤੀ ਗਈ ਤਾਂ ਜਥੇਬੰਦਕ ਢੰਗ ਨਾਲ ਇਸ ਦਾ ਡਟਵਾਂ ਵਿਰੋਧ ਕੀਤਾ ਜਾਵੇਗਾ।