ਸੈਂਕੜਿਆਂ ਦੀ ਗਿਣਤੀ ‘ਚ ਇੱਕੋ ਵੇਲੇ ਪੁਲਿਸ ਨੇ ਪਾਇਆ ਘੇਰਾ, 33 ਤਸਕਰ ਨਸ਼ਿਆਂ ਸਣੇ ਦਬੋਚੇ!
ਰਘਬੀਰ ਹੈਪੀ, ਬਰਨਾਲਾ 4 ਅਕਤੂਬਰ 2026
ਬਰਨਾਲਾ ਵਿੱਚ ਪੁਲਿਸ ਨੇ ਨਸ਼ਿਆਂ ਦੇ ਸੌਦਾਗਰਾਂ ਖ਼ਿਲਾਫ਼ ਅਜਿਹੀ ਜ਼ਬਰਦਸਤ ਕਾਰਵਾਈ ਕੀਤੀ ਹੈ ਕਿ ਪੂਰੇ ਇਲਾਕੇ ਵਿੱਚ ਹੜਕੰਪ ਮਚ ਗਿਆ। ਜਦੋਂ ਦਫ਼ਤਰੋਂ ਨਿਕਲੇ ‘ਵੱਡੇ ਸਾਬ੍ਹ’ ਯਾਨੀ ਜ਼ਿਲ੍ਹੇ ਦੇ ਉੱਚ ਪੁਲਿਸ ਅਧਿਕਾਰੀ ਆਪ ਮੈਦਾਨ ‘ਚ ਉੱਤਰੇ, ਤਾਂ ਸੈਂਕੜਿਆਂ ਦੀ ਗਿਣਤੀ ਵਿੱਚ ਪੁਲਿਸ ਬਲ ਨੇ ਇੱਕੋ ਵੇਲੇ ਤਸਕਰਾਂ ਦੇ ਠਿਕਾਣਿਆਂ ਨੂੰ ਚਾਰੇ ਪਾਸਿਓਂ ਘੇਰ ਲਿਆ। ਇਸ ਤਾਬੜਤੋੜ ਰੇਡ ਦੌਰਾਨ ਪੁਲਿਸ ਨੇ ਭਾਰੀ ਮਾਤਰਾ ਵਿੱਚ ਨਸ਼ੀਲੇ ਪਦਾਰਥਾਂ ਸਮੇਤ 33 ਤਸਕਰਾਂ ਨੂੰ ਮੌਕੇ ‘ਤੇ ਹੀ ਦਬੋਚ ਲਿਆ। ਆਓ ਤੁਹਾਨੂੰ ਦੱਸਦੇ ਹਾਂ ਖਾਕੀ ਦੇ ਇਸ ਵੱਡੇ ਓਪਰੇਸ਼ਨ ਦੀ ਪੂਰੀ ਕਹਾਣੀ..
ਅਫ਼ਸਰਾਂ ਦੀ ਅਗਵਾਈ ‘ਚ 200 ਜਵਾਨਾਂ ਦਾ ਧਾਵਾ
ਮੁੱਖ ਮੰਤਰੀ ਪੰਜਾਬ ਅਤੇ ਡਾਇਰੈਕਟਰ ਜਨਰਲ ਪੁਲਿਸ ਵੱਲੋਂ ‘ਯੁੱਧ ਨਸ਼ਿਆਂ ਵਿਰੁੱਧ’ ਚਲਾਈ ਵਿਸ਼ੇਸ਼ ਮੁਹਿੰਮ ਤਹਿਤ ਸ੍ਰੀ ਸਰਫਰਾਜ ਆਲਮ ਆਈ.ਪੀ.ਐਸ. ਸੀਨੀਅਰ ਕਪਤਾਨ ਪੁਲਿਸ ਬਰਨਾਲਾ ਦੀ ਸੁਚੱਜੀ ਅਗਵਾਈ ਹੇਠ ਅਤੇ ਸੰਜੀਵ ਗੋਇਲ ਐਸ.ਪੀ (ਇਨਵੈਸਟੀਗੇਸ਼ਨ) ਤੇ ਬਾਲ ਕ੍ਰਿਸ਼ਨ ਸਿੰਗਲਾ ਐਸ.ਪੀ (ਸਥਾਨਕ) ਦੀ ਸੁਪਰਵਿਜ਼ਨ ਵਿੱਚ ਪੁਲਿਸ ਟੀਮਾਂ ਗਠਿਤ ਕੀਤੀਆਂ ਗਈਆਂ। ਇਸ ਮਿਸ਼ਨ ਵਿੱਚ ਸ੍ਰੀ ਰਾਜਿੰਦਰਪਾਲ ਡੀ.ਐਸ.ਪੀ ਬਰਨਾਲਾ, ਸ੍ਰੀ ਜਸਕਰਨ ਸਿੰਘ ਡੀ.ਐਸ.ਪੀ ਤਪਾ, ਸ੍ਰੀ ਸਤਵਿੰਦਰ ਸਿੰਘ ਵਿਰਕ ਡੀ.ਐਸ.ਪੀ ਮਹਿਲ ਕਲਾਂ, ਸ੍ਰੀ ਕੁਲਵਿੰਦਰ ਸਿੰਘ ਡੀ.ਐਸ.ਪੀ ਹੈੱਡਕੁਆਟਰ, ਸ੍ਰੀ ਕੁਲਵੰਤ ਸਿੰਘ ਡੀ.ਐਸ.ਪੀ ਟਰੈਫ਼ਿਕ ਅਤੇ ਸ੍ਰੀ ਕਮਲਜੀਤ ਸਿੰਘ ਡੀ.ਐਸ.ਪੀ ND&PS ਸਮੇਤ ਸੀ.ਆਈ.ਏ. ਬਰਨਾਲਾ ਦੇ ਇੰਚਾਰਜ ਇੰਸਪੈਕਟਰ ਬਲਜੀਤ ਸਿੰਘ ਅਤੇ ਵੱਖ-ਵੱਖ ਥਾਣਿਆਂ ਦੇ ਕਰੀਬ 200 ਪੁਲਿਸ ਕਰਮਚਾਰੀ ਸ਼ਾਮਲ ਸਨ।
10 ਡਰੱਗ ਹੌਟ ਸਪਾਟਸ ‘ਚ ਪੁਲਿਸ ਦੀ ਤਲਾਸ਼ੀ
ਪੁਲਿਸ ਦੀਆਂ ਵੱਖ-ਵੱਖ ਟੀਮਾਂ ਨੇ ਜ਼ਿਲ੍ਹਾ ਬਰਨਾਲਾ ਦੇ 10 ਚਿੰਨ੍ਹਤ ‘ਡਰੱਗ ਹੌਟ ਸਪਾਟਸ’ ਉੱਤੇ ਇੱਕੋ ਵੇਲੇ ਛਾਪੇਮਾਰੀ ਕੀਤੀ। ਨਸ਼ੇ ਦੇ ਆਦੀ ਅਤੇ ਸ਼ੱਕੀ ਤਸਕਰਾਂ ਦੇ ਰਿਹਾਇਸ਼ੀ ਠਿਕਾਣਿਆਂ ‘ਤੇ ਅਚਾਨਕ ਰੇਡ ਕਰਕੇ ਪੂਰੇ ਇਲਾਕੇ ‘ਚ ਸਰਚ ਅਭਿਆਨ ਚਲਾਇਆ ਗਿਆ।
14 ਮੁਕੱਦਮੇ ਦਰਜ, 33 ਅਪਰਾਧੀ ਪੁਲਿਸ ਦੀ ਗ੍ਰਿਫ਼ਤ ‘ਚ
ਇਸ ਸਪੈਸ਼ਲ ਓਪਰੇਸ਼ਨ ਦੌਰਾਨ ਪੁਲਿਸ ਨੇ ਸ਼ਿਕੰਜਾ ਕੱਸਦਿਆਂ ਕੁੱਲ 14 ਮੁਕੱਦਮੇ ਦਰਜ ਕੀਤੇ ਹਨ:
-
ND&PS ਐਕਟ ਤਹਿਤ 30 ਵਿਅਕਤੀ ਗ੍ਰਿਫ਼ਤਾਰ ਕੀਤੇ ਗਏ।
-
ਲੋਕਲ ਐਂਡ ਸਪੈਸ਼ਲ ਲਾਅ ਅਤੇ BNS ਤਹਿਤ 3 ਵਿਅਕਤੀ ਕਾਬੂ ਕੀਤੇ ਗਏ।
-
13 ਵਿਅਕਤੀਆਂ ਖ਼ਿਲਾਫ਼ Preventive Action (ਰੋਕਥਾਮ ਕਾਰਵਾਈ) ਲਿਆਂਦੀ ਗਈ।
ਹੇਰੋਇਨ, ਨਸ਼ੀਲੀਆਂ ਗੋਲੀਆਂ ਤੇ ਲਾਹਣ ਜ਼ਬਤ
ਤਲਾਸ਼ੀ ਅਭਿਆਨ ਦੌਰਾਨ ਪੁਲਿਸ ਨੇ ਭਾਰੀ ਮਾਤਰਾ ਵਿੱਚ ਨਸ਼ਾ ਬਰਾਮਦ ਕੀਤਾ ਹੈ:
-
327 ਗ੍ਰਾਮ ਹੇਰੋਇਨ
-
200 ਨਸ਼ੀਲੀਆਂ ਗੋਲੀਆਂ
-
170 ਲੀਟਰ ਲਾਹਣ
ਹੈਲਪਲਾਈਨ ਨੰਬਰ ਜਾਰੀ, ਜਾਣਕਾਰੀ ਦੇਣ ਵਾਲੇ ਦੀ ਪਛਾਣ ਰਹੂ ਗੁਪਤ
ਐਸ.ਐਸ.ਪੀ. ਬਰਨਾਲਾ ਨੇ ਦੱਸਿਆ ਕਿ ਜ਼ਿਲ੍ਹੇ ਦੇ ਪਿੰਡਾਂ ਵਿੱਚ VDC ਕਮੇਟੀਆਂ ਨਾਲ ਲਗਾਤਾਰ ਮੀਟਿੰਗਾਂ ਕੀਤੀਆਂ ਜਾ ਰਹੀਆਂ ਹਨ। ‘ਸੇਫ਼ ਪੰਜਾਬ’ ਮੁਹਿੰਮ ਤਹਿਤ ਡਰੱਗ ਹੈਲਪਲਾਈਨ ਨੰਬਰ 97791-00200 ਜਾਰੀ ਕੀਤਾ ਗਿਆ ਹੈ। ਕੋਈ ਵੀ ਆਮ ਨਾਗਰਿਕ ਬਿਨਾਂ ਕਿਸੇ ਡਰ ਦੇ ਨਸ਼ੇ ਦੀ ਵਿਕਰੀ ਬਾਰੇ ਜਾਣਕਾਰੀ ਦੇ ਸਕਦਾ ਹੈ, ਅਤੇ ਜਾਣਕਾਰੀ ਦੇਣ ਵਾਲੇ ਵਿਅਕਤੀ ਦੀ ਪਛਾਣ ਪੂਰੀ ਤਰ੍ਹਾਂ ਗੁਪਤ ਰੱਖੀ ਜਾਵੇਗੀ।
