ਧੀਆਂ ਦੀ ਦਸਤਕ: ਮੈਰਿਟ ਸੂਚੀ ਵਿੱਚ ਬਰਨਾਲਾ ਦੀਆਂ ਬੇਟੀਆਂ ਨੇ ਮਾਰੀ ਬਾਜ਼ੀ
ਦੀਪਕ ਬਾਂਸਲ ਦੀਪੂ , ਬਰਨਾਲਾ 13 ਮਈ 2026
ਜੇ ਇਰਾਦੇ ਨੇਕ ਹੋਣ ਅਤੇ ਮਿਹਨਤ ਸੱਚੀ, ਤਾਂ ਇਤਿਹਾਸ ਬਦਲਦਿਆਂ ਦੇਰ ਨਹੀਂ ਲੱਗਦੀ । ਜ਼ਿਲ੍ਹਾ ਬਰਨਾਲਾ ਨੇ ਬਾਰ੍ਹਵੀਂ ਜਮਾਤ ਦੇ ਨਤੀਜਿਆਂ ਵਿੱਚ ਕੁਝ ਅਜਿਹਾ ਹੀ ਕਰ ਦਿਖਾਇਆ ਹੈ। ਪਿਛਲੇ ਕਈ ਸਾਲਾਂ ਤੋਂ ਸੂਬੇ ਵਿੱਚ 23ਵੇਂ ਸਥਾਨ ‘ਤੇ ਰਹਿ ਕੇ ‘ਫਾਡੀ ਹੋਣ ਦਾ ਮਿਹਣਾ ਸਹਿਣ ਵਾਲੇ ਇਸ ਜ਼ਿਲ੍ਹੇ ਨੇ ਇਸ ਵਾਰ ਸ਼ਾਨਦਾਰ ਵਾਪਸੀ ਕਰਦਿਆਂ ਸੂਬੇ ਵਿੱਚੋਂ 15ਵਾਂ ਸਥਾਨ ਹਾਸਲ ਕੀਤਾ ਹੈ। ਇਹ ਜਿੱਤ ਸਿਰਫ਼ ਅੰਕਾਂ ਦੀ ਨਹੀਂ, ਸਗੋਂ ਪੇਂਡੂ ਖੇਤਰ ਦੇ ਸਰਕਾਰੀ ਸਕੂਲਾਂ ਦੇ ਉਨ੍ਹਾਂ ਵਿਦਿਆਰਥੀਆਂ ਦੇ ਜਜ਼ਬੇ ਦੀ ਹੈ, ਜਿਨ੍ਹਾਂ ਨੇ ਪ੍ਰਾਈਵੇਟ ਸਕੂਲਾਂ ਦੇ ਤਖ਼ਤੇ ਪਲਟ ਦਿੱਤੇ ਹਨ।
ਸਰਕਾਰੀ ਸਕੂਲਾਂ ਦਾ ਸੁਪਰ-10
ਇਸ ਵਾਰ ਦਾ ਨਤੀਜਾ ਕਿਸੇ ਇਨਕਲਾਬ ਤੋਂ ਘੱਟ ਨਹੀਂ ਹੈ। ਜ਼ਿਲ੍ਹੇ ਦੇ ਟਾਪ-10 ਵਿਦਿਆਰਥੀਆਂ ਵਿੱਚ ਇੱਕ ਵੀ ਪ੍ਰਾਈਵੇਟ ਸਕੂਲ ਦਾ ਨਾਮ ਨਾ ਹੋਣਾ ਇਹ ਸਾਬਤ ਕਰਦਾ ਹੈ ਕਿ ਸਰਕਾਰੀ ਸਕੂਲਾਂ ਦੀ ਸਿੱਖਿਆ ਦਾ ਮਿਆਰ ਹੁਣ ਅਰਸ਼ਾਂ ‘ਤੇ ਹੈ। ਪਿੰਡ ਮੌੜਾਂ ਦੀ ਨਿਸ਼ਾ ਰਾਣੀ ਨੇ 99.20% ਅੰਕ ਲੈ ਕੇ ਸੂਬੇ ਵਿੱਚ 5 ਵਾਂ ਸਥਾਨ ਹਾਸਲ ਕਰਕੇ ਜ਼ਿਲ੍ਹੇ ਦਾ ਨਾਮ ਰੌਸ਼ਨ ਕੀਤਾ ਹੈ। ਉਸ ਦੇ ਨਾਲ ਹੀ ਤਨਵੀਰ ਕੌਰ (ਸ਼ਹਿਣਾ) ਅਤੇ ਦਿਵਿਆਜੋਤ ਸਿੰਘ (ਸੁਖਪੁਰਾ) ਨੇ ਵੀ ਮੈਰਿਟ ਵਿੱਚ ਆਪਣੀ ਧਾਕ ਜਮਾਈ ਹੈ।
ਧੀਆਂ ਨੇ ਵਧਾਇਆ ਮਾਣ
ਨਤੀਜਿਆਂ ਨੇ ਇੱਕ ਵਾਰ ਫਿਰ ਸਾਬਿਤ ਕਰ ਦਿੱਤਾ ਕਿ ਜੇ ਧੀਆਂ ਨੂੰ ਮੌਕਾ ਮਿਲੇ ਤਾਂ ਉਹ ਅਸਮਾਨ ਛੂਹ ਸਕਦੀਆਂ ਹਨ। ਮੈਰਿਟ ਵਿੱਚ ਆਏ 9 ਵਿਦਿਆਰਥੀਆਂ ਵਿੱਚੋਂ 7 ਲੜਕੀਆਂ ਹਨ। ਖ਼ਾਸ ਗੱਲ ਇਹ ਵੀ ਹੈ ਕਿ ਇਹ ਸਾਰੇ ਹੀਰੇ ਪੇਂਡੂ ਮਿੱਟੀ ਵਿੱਚੋਂ ਉੱਠ ਕੇ ਆਏ ਹਨ। ਸ਼ਹਿਣਾ, ਸੁਖਪੁਰਾ, ਫਰਵਾਹੀ ਅਤੇ ਭਦੌੜ ਵਰਗੇ ਇਲਾਕਿਆਂ ਦੇ ਸਰਕਾਰੀ ਸਕੂਲਾਂ ਨੇ ਸਾਬਤ ਕਰ ਦਿੱਤਾ ਹੈ ਕਿ ਪ੍ਰਤਿਭਾ ਸਿਰਫ਼ ਵੱਡੇ ਸ਼ਹਿਰਾਂ ਜਾਂ ਮਹਿੰਗੇ ਸਕੂਲਾਂ ਦੀ ਮੋਹਤਾਜ ਨਹੀਂ ਹੁੰਦੀ।
ਮਿਹਨਤ ਦਾ ਮੁੱਲ
ਜ਼ਿਲ੍ਹਾ ਸਿੱਖਿਆ ਅਫ਼ਸਰ ਸੁਨੀਤਇੰਦਰ ਸਿੰਘ ਦੇ ਚਿਹਰੇ ‘ਤੇ ਖ਼ੁਸ਼ੀ ਸਾਫ਼ ਝਲਕ ਰਹੀ ਹੈ। ਉਨ੍ਹਾਂ ਮੁਤਾਬਕ, ਇਹ ਸਫ਼ਲਤਾ ਸਰਕਾਰ ਵੱਲੋਂ ਦਿੱਤੇ ਗਏ ਬੁਨਿਆਦੀ ਢਾਂਚੇ ਅਤੇ ਅਧਿਆਪਕਾਂ-ਵਿਦਿਆਰਥੀਆਂ ਦੀ ਦਿਨ-ਰਾਤ ਇੱਕ ਕਰਕੇ ਕੀਤੀ ਮਿਹਨਤ ਦਾ ਨਤੀਜਾ ਹੈ। ਬਰਨਾਲਾ ਹੁਣ ਰੁਕਣ ਵਾਲਾ ਨਹੀਂ ਹੈ; ਇਹ ਤਾਂ ਸਿਰਫ਼ ਸ਼ੁਰੂਆਤ ਹੈ, ਆਉਣ ਵਾਲੇ ਸਮੇਂ ਵਿੱਚ ਇਹ ਜ਼ਿਲ੍ਹਾ ਸੂਬੇ ਦੇ ਨਕਸ਼ੇ ‘ਤੇ ਸਭ ਤੋਂ ਉੱਪਰ ਚਮਕੇਗਾ। ਬਰਨਾਲਾ ਜਿਲ੍ਹੇ ਦੇ ਇਨ੍ਹਾਂ ਨਤੀਜਿਆਂ ਨੇ ਹਰ ਉਸ ਵਿਦਿਆਰਥੀ ਨੂੰ ਉਮੀਦ ਦਿੱਤੀ ਹੈ ਜੋ ਸੀਮਤ ਸਾਧਨਾਂ ਵਿੱਚ ਵੱਡੇ ਸੁਪਨੇ ਦੇਖਦਾ ਹੈ। ਜੇ ਬਰਨਾਲਾ 23 ਵੇਂ ਤੋਂ ਛਡੱਪਾ ਮਾਰ ਕੇ 15 ਵੇਂ ਸਥਾਨ ‘ਤੇ ਆ ਸਕਦਾ ਹੈ, ਤਾਂ ਤੁਸੀਂ ਵੀ ਕਿਸੇ ਵੀ ਮੁਕਾਮ ਨੂੰ ਹਾਸਲ ਕਰ ਸਕਦੇ ਹੋ!
