ਲੁਟੇਰਿਆਂ ਦੀ ਹੋਈ ਪਹਿਚਾਣ, ਲੱਭਣ ਲੱਗੀ ਪੁਲਿਸ
ਹਰਿੰਦਰ ਨਿੱਕਾ , ਬਰਨਾਲਾ 12 ਦਸੰਬਰ 2021
ਬਾਜਾਖਾਨਾ ਰੋਡ ਤੋਂ ਤਰਕਸ਼ੀਲ ਚੌਂਕ ਬਰਨਾਲਾ ਵੱਲ ਜਾਂਦੀ ਲਿੰਕ ਸੜਕ ਤੋਂ ਲੰਘ ਰਹੇ ਨੌਜਵਾਨ ਨੂੰ ਰਾਹ ਵਿੱਚ ਘੇਰ ਕੇ ਤਿੰਨ ਲੁਟੇਰੇ, ਉਸ ਦਾ ਮੋਟਰ ਸਾਈਕਲ ਅਤੇ ਬਟੂਆ ਖੋਹ ਕੇ ਫੁਰਰ ਹੋ ਗਏ। ਪੁਲਿਸ ਨੇ ਵਾਰਦਾਤ ਤੋਂ ਦੂਜੇ ਦਿਨ ਤਿੰਨ ਦੋਸ਼ੀਆਂ ਖਿਲਾਫ ਕੇਸ ਦਰਜ਼ ਕਰਕੇ,ਉਨਾਂ ਦੀ ਭਾਲ ਸ਼ੁਰੂ ਕਰ ਦਿੱਤੀ। ਪੁਲਿਸ ਨੂੰ ਦਿੱਤੇ ਬਿਆਨ ਵਿੱਚ ਸੁਖਜਿੰਦਰ ਸਿੰਘ ਪੁੱਤਰ ਸੂਬਾ ਸਿੰਘ ਵਾਸੀ ਗਲੀ ਨੰਬਰ .5 ,ਸਾਹਿਬਜਾਦਾ ਅਜੀਤ ਸਿੰਘ ਨਗਰ ਬਰਨਾਲਾ ਨੇ ਦੱਸਿਆ ਕਿ ਮਿਤੀ 10-12-2021 ਸਮਾਂ ਸ਼ਾਮ ਕਰੀਬ 5 ਵਜੇ, ਉਹ ਆਪਣੇ ਮੋਟਰਸਾਈਕਲ ਮਾਰਕਾ ਹੀਰੋ , ਸਪਲੈਂਡਰ ਪਲੱਸ ਪਰ ਆਪਣੀ ਰਿਸਤੇਦਾਰੀ ਵਿੱਚੋਂ ਪਿੰਡ ਸਹਿਣਾ ਤੋਂ ਬਰਨਾਲਾ ਵੱਲ ਆ ਰਿਹਾ ਸੀ । ਜਦੋਂ ਉਹ ਬਾਜਾਖਾਨਾ ਰੋਡ ਤੋਂ ਲਿੰਕ ਰੋਡ ਤਰਕਸ਼ੀਲ ਚੌਂਕ ਬਰਨਾਲਾ ਨੂੰ ਜਾ ਰਿਹਾ ਸੀ ਤਾਂ ਰਾਹ ਵਿੱਚ ਇੱਕ ਬਿਨਾਂ ਨੰਬਰੀ ਮੋਟਰਸਾਈਕਲ ਪਰ ਸਵਾਰ ਵਿਅਕਤੀਆਂ ਨੇ ਉਸ ਨੂੰ ਅਗਿਓਂ ਘੇਰ ਲਿਆ। ਦੋਸ਼ੀਆਂ ਨੇ ਘੇਰ ਕੇ ਤੇ ਡਰ ਦਿਖਾ ਕੇ ਮੇਰਾ ਮੋਟਰਸਾਈਕਲ ਅਤੇ ਜਬਰਦਸਤੀ ਜੇਬ ਵਿੱਚੋਂ ਬਟੂਆ ਵੀ ਖੋਹ ਲਿਆ। ਬਟੂਏ ਵਿਚ ਅਧਾਰ ਕਾਰਡ ਤੇ ਇਲਾਵਾ ਕੁੱਝ ਨਗਦੀ ਵੀ ਸੀ। ਲੁਟੇਰੇ ਵਾਰਦਾਤ ਤੋਂ ਬਾਅਦ ਫਰਾਰ ਹੋ ਗਏ।
ਮੁਦਈ ਨੇ ਦੋਸ਼ੀਆਂ ਨੂੰ ਪਛਾਣਿਆ,,,
ਮੁਦਈ ਨੇ ਦੱਸਿਆ ਕਿ ਉਸ ਨੇ ਦੋਸ਼ੀਆਂ ਦੀ ਪਹਿਚਾਣ ਕਰ ਲਈ, ਜਿੰਨ੍ਹਾਂ ਵਿੱਚ ਰਮਨਜੀਤ ਸਿੰਘ ਵਾਸੀ ਦੁਸ਼ਹਿਰਾ ਗਰਾਉਂਡ ਦੇ ਸਾਹਮਣੇ ਝੁੱਗੀਆਂ ਬਰਨਾਲਾ, ਸੁਖਜਿੰਦਰ ਸਿੰਘ ਉਰਫ ਸੁੱਖੀ ਅਤੇ ਕੁਲਵੰਤ ਸਿੰਘ ਉਰਫ ਕੰਤੀ ਵਾਸੀ ਢਿੱਲਵਾਂ ,ਥਾਣਾ ਤਪਾ ਸ਼ਾਮਿਲ ਹਨ। ਮਾਮਲੇ ਦੇ ਤਫਤੀਸ਼ ਅਧਿਕਾਰੀ ਏਐਸਆਈ ਗੁਰਮੇਲ ਸਿੰਘ ਨੇ ਦੱਸਿਆ ਕਿ ਮੁਦਈ ਦੇ ਬਿਆਨ ਪਰ, ਨਾਮਜਦ ਤਿੰਨੋਂ ਦੋਸ਼ੀਆਂ ਖਿਲਾਫ ਕੇਸ ਦਰਜ਼ ਕਰਕੇ,ਉਨਾਂ ਦੀ ਤਲਾਸ਼ ਸ਼ੁਰੂ ਕਰ ਦਿੱਤੀ ਹੈ। ਜਲਦ ਹੀ ਦੋਸ਼ੀਆਂ ਨੂੰ ਗਿਰਫਤਾਰ ਕਰ ਲਿਆ ਜਾਵੇਗਾ।
