ਦੇਰ ਰਾਤ ਪੀੜਾਂ ਨਾਲ ਕੁਰਲਾਉਂਦੀ ਔਰਤ ਲਈ ਫਰਿਸ਼ਤਾ ਬਣ ਕੇ ਪਹੁੰਚੀ ਪੁਲਿਸ
ਹਰਿੰਦਰ ਨਿੱਕਾ ਬਰਨਾਲਾ 15 ਅਪ੍ਰੈਲ 2020
ਕਿੱਤਾ ਜਾਂ ਕੰਮ ਕੋਈ ਵੀ ਹੋਵੇ, ਉਸ ਵਿੱਚ ਚੰਗੇ ਤੇ ਮਾੜੇ ਦੋਵੇਂ ਤਰਾਂ ਦੇ ਕਿਰਦਾਰ ਦੇ ਵਿਅਕਤੀ ਅਕਸਰ ਹੀ ਦੇਖਣ ਨੂੰ ਮਿਲ ਜਾਂਦੇ ਨੇ। ਇਸੇ ਹੀ ਤਰਾਂ ਦਾ ਖਾਕੀ ਦੀ ਸ਼ਾਨ ਨੂੰ ਵਧਾਉਣ ਵਾਲਾ ਵਰਦੀ ਦਾ ਕਿਰਦਾਰ ਬੁੱਧਵਾਰ ਦੀ ਦੇਰ ਰਾਤ ਉਦੋਂ ਸਾਹਮਣੇ ਆਇਆ। ਜਦੋਂ ਥਾਣਾਂ ਟੱਲੇਵਾਲ ਅਧੀਨ ਪੈਂਦੇ ਪਿੰਡ ਛੀਨੀਵਾਲ ਖੁਰਦ ਵਿਖੇ ਆਪਣੇ ਪੇਕੇ ਘਰ ਆਈ ਹੋਈ ਕਰੀਬ 22/23 ਵਰ੍ਹਿਆਂ ਦੀ ਗਰਭਵਤੀ ਔਰਤ ਨੈਨਸੀ ਕੌਰ ਨੂੰ ਦੇਰ ਰਾਤ ਜੰਮਣ ਪੀੜਾਂ ਸ਼ੁਰੂ ਹੋ ਗਈਆਂ। ਪਰਿਵਾਰ ਨੂੰ ਹੱਥਾਂ ਪੈਰਾਂ ਦੀ ਪੈ ਗਈ, ਇੱਕ ਲੌਕਡਾਉਣ ਦੂਜਾ ਦੇਰ ਰਾਤ ਦਾ ਸਮਾਂ, ਘਰ ਚ, ਚੀਖ ਪੁਕਾਰ ਸੁਣਕੇ ਕੋਲੋ ਲੰਘਦੀ ਪੁਲਿਸ ਦੀ ਪੈਟਰੌਲਿੰਗ ਪਾਰਟੀ ਵੀ ਪਹੁੰਚ ਗਈ। ਪੁਲਿਸ ਪਾਰਟੀ ਦੀ ਅਗਵਾਈ ਥਾਣੇਦਾਰ ਪਰਮਜੀਤ ਸਿੰਘ ਕਰ ਰਿਹਾ ਸੀ ਤੇ ਪੁਲਿਸ ਪਾਰਟੀ ਚ, ਹੌਲਦਾਰ ਸੁਖਪਾਲ ਸਿੰਘ ਤੇ ਹੌਲਦਾਰ ਲਖਵੀਰ ਸਿੰਘ ਸ਼ਾਮਿਲ ਸਨ। 
ਪੁਲਿਸ ਪਾਰਟੀ ਬਿਨਾਂ ਕੋਈ ਦੇਰੀ ਕੀਤਿਆਂ ਪੀੜਾਂ ਨਾਲ ਕੁਰਲਾ ਰਹੀ, ਗਰਭਵਤੀ ਔਰਤ ਨੂੰ ਉਹਦੇ ਭਰਾ ਤੇ ਹੋਰ ਪਰਿਵਾਰ ਦੇ ਮੈਂਬਰਾਂ ਸਮੇਤ ਗੱਡੀ ਚ, ਲੈ ਕੇ ਛੀਨੀਵਾਲ ਖੁਰਦ ਤੋਂ ਰਾਤ ਕਰੀਬ ਸਾਢੇ 10 ਕੁ ਵਜੇ ਸਿਵਲ ਹਸਪਤਾਲ ਬਰਨਾਲਾ ਪਹੁੰਚ ਗਈ। ਜਿੱਥੇ ਉਸ ਨੂੰ ਐਮਰਜੈਂਸੀ ਚ, ਭਰਤੀ ਕਰਵਾਇਆ। ਇਹ ਮੰਨੋ ਕਿ ਪੀੜਾਂ ਨਾਲ ਕੁਰਲਾਉਂਦੀ ਔਰਤ ਲਈ ਪੁਲਿਸ ਪਾਰਟੀ ਫਰਿਸ਼ਤਾ ਬਣ ਕੇ ਬਹੁੜੀ। ਪਤਾ ਇਹ ਵੀ ਲੱਗਿਆ ਕਿ ਲੌਕਡਾਉਨ ਦੇ ਕਾਰਣ ਪਿੰਡ ਦੇ ਕਿਸੇ ਵੀ ਮੋਹਤਬਰ ਵਿਅਕਤੀ ਨੇ ਪਰਿਵਾਰ ਨਾਲ ਰਾਤ ਨੂੰ ਚੱਲਣ ਲਈ ਹਾਂ ਨਹੀਂ ਸੀ ਕੀਤੀ। ਹਸਪਤਾਲ ਪਹੁੰਚੀ ਔਰਤ ਨੈਨਸੀ ਤੇ ਉਸ ਦੇ ਭਰਾ ਪ੍ਰਗਟ ਸਿੰਘ ਤੇ ਪਰਿਵਾਰ ਦੇ ਹੋਰ ਮੈਂਬਰਾਂ ਨੇ ਪੁਲਿਸ ਪਾਰਟੀ ਦਾ ਸ਼ੁਕਰੀਆ ਅਦਾ ਕਰਦੇ ਹੋਏ ਕਿਹਾ ਕਿ ਜੇ ਅੱਜ ਪੁਲਿਸ ਪਾਰਟੀ ਉਨ੍ਹਾਂ ਦੀ ਹਸਪਤਾਲ ਲਿਆਉਣ ਚ, ਮੱਦਦ ਨਾ ਕਰਦੀ ਤਾਂ ਹੋ ਸਕਦੈ,,,,। ਉੱਧਰ ਪੁਲਿਸ ਪਾਰਟੀ ਦੇ ਇੰਚਾਰਜ ਥਾਣੇਦਾਰ ਪਰਮਜੀਤ ਸਿੰਘ ,ਤੇ ਦੋਂਵੇ ਹੌਲਦਾਰਾਂ ਸੁਖਪਾਲ ਸਿੰਘ ਤੇ ਲਖਵੀਰ ਸਿੰਘ ਨੇ ਕਿਹਾ ਕਿ ਉਹ ਐਸਐਸਪੀ ਸ੍ਰੀ ਸੰਦੀਪ ਗੋਇਲ ਦੁਆਰਾ ਲੋਕਾਂ ਦੀ ਸੇਵਾ ਕਰਨ ਦੀ ਦਿੱਤੀ ਜਾ ਰਹੀ ਪ੍ਰੇਰਣਾ ਤੋਂ ਪ੍ਰੇਰਿਤ ਹੋ ਕੇ ਉਹਨਾਂ ਇਸ ਨੂੰ ਆਪਣਾ ਫਰਜ਼ ਸਮਝ ਕੇ ਨਿਭਾਇਆ ਹੈ।
