ਪਤਨੀ ਤੇ ਅਣਮਨੁੱਖੀ ਅੱਤਿਆਚਾਰ ਕਰਨਾ ਪਤੀ ਨੂੰ ਪਿਆ ਮਹਿੰਗਾ
ਹਰਿੰਦਰ ਨਿੱਕਾ , ਬਰਨਾਲਾ 21 ਸਤੰਬਰ 2021
ਪਿਆਰ ਵਿਆਹ ਦਾ ਸ਼ਬਦ ਸੁਣਦਿਆਂ ਹੀ ਬੇਸ਼ੱਕ ਹਰ ਕਿਸੇ ਵਿਅਕਤੀ ਦੇ ਜਿਹਨ ਵਿੱਚ ਮਾਪਿਆਂ ਦੀ ਮਰਜੀ ਤੋਂ ਬਿਨਾਂ ਲੜਕੇ-ਲੜਕੀਆਂ ਵੱਲੋਂ ਆਪ ਮੁਹਾਰਾ ਫੈਸਲਾ ਲੈ ਕੇ ਕੋਰਟ ਮੈਰਿਜ ਕਰਵਾ ਲੈਣ ਦਾ ਘਟਨਾਕ੍ਰਮ ਯਕਦਮ ਸਾਹਮਣੇ ਆ ਜਾਂਦਾ ਹੈ। ਪਰੰਤੂ ਉਹੀ ਲਵ ਮੈਰਿਜ ਵਿੱਚੋਂ, ਕੁੱਝ ਸਮੇਂ ਬਾਅਦ ਪਿਆਰ ਦਾ ਖਤਮ ਹੋ ਜਾਣਾ, ਲੜਕੀਆਂ ਨੂੰ ਬੇਹੱਦ ਦੁਖਦ ਅਹਿਸਾਸ ਕਰਵਾਉਂਦਾ ਹੈ। ਕਿਉਂਕਿ ਲੜਕੀ ਦਾ ਆਪ ਮੁਹਾਰਾ ਫੈਸਲਾ, ਉਸ ਨੂੰ ਆਪਣੇ ਮਾਪਿਆਂ ਤੇ ਭੈਣ ਭਰਾਵਾਂ ਤੋਂ ਦੂਰ ਤਾਂ ਕਰ ਹੀ ਦਿੰਦਾ ਹੈ। ਬਲਕਿ ਲੜਕੀ ਦੇ ਮੁੜ ਮਾਪਿਆਂ ਕੋਲ ਘਰ ਜਾਣ ਦੇ ਸਾਰੇ ਰਸਤੇ ਬੰਦ ਹੀ ਹੋ ਜਾਂਦੇ ਹਨ। ਅਜਿਹੇ ਹਾਲਤ ‘ਚ ਲੜਕੀ ਦੀ ਹਾਲਤ ” ਨਾ ਘਰ ਦੀ ਨਾ ਘਾਟ ਦੀ ” ਵਾਲੀ ਹੋ ਜਾਂਦੀ ਹੈ।
ਅਜਿਹਾ ਹੀ ਇੱਕ ਤਾਜ਼ਾ ਘਟਨਾਕ੍ਰਮ ਸ਼ਹਿਰ ਦੇ ਇੱਕ ਬਾਹਰੀ ਇਲਾਕੇ ਵਿੱਚ ਸਾਹਮਣੇ ਆਇਆ ਹੈ। ਜਿੱਥੋਂ ਦੀ ਰਹਿਣ ਵਾਲੀ ਇੱਕ 23 ਕੁ ਵਰ੍ਹਿਆਂ ਦੀ ਅਲ੍ਹੜ ਕੁੜੀ ਨੇ ਆਪਣੇ ਪ੍ਰੇਮੀ ਦੇ ਬਹਿਕਾਵੇ ਵਿੱਚ ਆ ਕੇ ਮਾਪਿਆਂ ਦੀ ਮਰਜ਼ੀ ਤੋਂ ਬਿਨਾਂ ਲਵ ਮੈਰਿਜ ਕਰਵਾ ਲਈ। ਲੜਕੀ ਅਨੁਸਾਰ ਲਵ ਮੈਰਿਜ ਕਰਵਾਉਣ ਤੋਂ ਬਾਅਦ ਲਵ ਮੈਰਿਜ ਵਿੱਚੋਂ , ਲਵ ਖਤਮ ਹੋ ਗਿਆ , ਬੱਸ ਸਿਰਫ ਵਿਆਹ ਦਾ ਕਾਨੂੰਨੀ ਬੰਧਨ ਹੀ ਰਹਿ ਗਿਆ। ਪੀੜਤ ਲੜਕੀ ਨੇ ਥਾਣਾ ਸਿਟੀ 1 ਬਰਨਾਲਾ ਵਿਖੇ ਪੁਲਿਸ ਨੂੰ ਦਿੱਤੇ ਬਿਆਨ ਵਿੱਚ ਬੇਹੱਦ ਗੰਭੀਰ ਦੋਸ਼ ਲਾਇਆ ਕਿ ਉਸ ਦਾ ਪਤੀ ਇਕਬਾਲ ਉਸ ਨਾਲ ਜਬਰਦਸਤੀ ਗੈਰ ਕੁਦਰਤੀ ਸਬੰਧ ਬਣਾਉਂਦਾ ਰਿਹਾ।
ਵਿਰੋਧ ਕਰਨ ਤੇ ਉਸ ਦੀ ਬੇਰਹਿਮੀ ਨਾਲ ਕੁੱਟਮਾਰ ਕਰਕੇ, ਅਣਮਨੁੱਖੀ ਅੱਤਿਆਚਾਰ ਕਰਦਾ ਰਿਹਾ। ਪੁਲਿਸ ਨੇ ਨਾਮਜ਼ਦ ਦੋਸ਼ੀ ਇਕਬਾਲ ਖਿਲਾਫ ਅਧੀਨ ਜੁਰਮ 377 /323/506 ਆਈ.ਪੀ.ਸੀ ਤਹਿਤ ਕੇਸ ਦਰਜ਼ ਕਰਕੇ, ਉਸਦੀ ਤਲਾਸ਼ ਸ਼ੁਰੂ ਕਰ ਦਿੱਤੀ। ਥਾਣਾ ਸਿਟੀ 1 ਬਰਨਾਲਾ ਦੇ ਐਸਐਚਉ ਲਖਵਿੰਦਰ ਸਿੰਘ ਨੇ ਪੁੱਛਣ ਤੇ ਦੱਸਿਆ ਕਿ ਮਾਮਲੇ ਦੀ ਤਫਤੀਸ਼ ਸਬ ਇੰਸਪੈਕਟਰ ਸੁਖਵਿੰਦਰ ਕੌਰ ਨੇ ਸ਼ੁਰੂ ਕਰ ਦਿੱਤੀ ਹੈ। ਜਲਦ ਹੀ ਦੋਸ਼ੀ ਨੂੰ ਗਿਰਫਤਾਰ ਕਰ ਲਿਆ ਜਾਵੇਗਾ।
