ਹਰਿੰਦਰ ਨਿੱਕਾ , ਬਰਨਾਲਾ 10 ਫਰਵਰੀ 2021
ਨਗਰ ਕੌਂਸਲ ਦੇ ਵਾਰਡ ਨੰਬਰ 8 ਦੀ ਗਲੀ ਨੰਬਰ 3 ਦੇ ਸਮੂਹ ਮੁਹੱਲਾ ਵਾਸੀਆਂ ਨੇ ਐਫ.ਸੀ.ਆਈ. ਗੋਦਾਮ ਦੇ ਨੇੜੇ ਪੱਕੇ ਤੌਰ ਤੇ ਲੰਬੇ ਅਰਸੇ ਤੋਂ ਬਣੇ ਕੂੜੇ ਦੇ ਡੰਪ ਨੂੰ ਹਟਾ ਕੇ ਪਾਰਕ ਬਣਾਉਣ ਵਾਲੇ ਕਾਂਗਰਸੀ ਉਮੀਦਵਾਰ ਮਹੇਸ਼ ਕੁਮਾਰ ਲੋਟਾ ਨੂੰ ਲੱਡੂਆਂ ਨਾਲ ਤੋਲਿਆ ਗਿਆ । ਇਸ ਮੌਕੇ ਮੁਹੱਲਾ ਵਾਸੀਆਂ ਨੇ ਮਹੇਸ਼ ਕੁਮਾਰ ਲੋਟਾ ਨੂੰ ਯਕੀਨ ਦਿਵਾਇਆ ਕਿ ਜਿਵੇਂ, ਉਨਾਂ ਗੰਦਗੀ ਕਾਰਣ ਨਰਕ ਵਰਗੀ ਹਾਲਤ ਵਿੱਚ ਰਹਿੰਦੇ ਲੋਕਾਂ ਨੂੰ ਡੰਪ ਚੁਕਵਾ ਕੇ ਰਾਹਤ ਦਿੱਤੀ ਹੈ। ਉਵੇਂ ਹੀ ਵਾਰਡ ਵਾਸੀ ਵੀ ਤੁਹਾਨੂੰ ਵੱਡੀ ਸੰਖਿਆਂ ਵਿੱਚ ਮਤਦਾਨ ਕਰਕੇ ਖੁਸ਼ ਕਰ ਦੇਣਗੇ। ਮੁਹੱਲਾ ਵਾਸੀਆਂ ਵੱਲੋਂ ਮਿਲੇ ਸਨਮਾਨ ਤੋਂ ਗਦਗਦ ਪ੍ਰਸੰਨ ਮਹੇਸ਼ ਕੁਮਾਰ ਲੋਟਾ ਨੇ ਕਿਹਾ ਕਿ ਵਾਰਡ ਨੂੰ ਸਹੂਲਤਾਂ ਪੱਖੋਂ ਨੰਬਰ ਇੱਕ ਬਣਾਉਣ ਵਿੱਚ ਉਹ ਕੋਈ ਕਮੀ ਨਹੀਂ ਛੱਡਣਗੇ। 
ਲੋਟਾ ਨੇ ਕਿਹਾ ਕਿ ਵਾਰਡ ਵਾਸੀਆਂ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਇਲਾਕੇ ਦੇ ਲੋਕ ਪੀਣ ਵਾਲੇ ਪਾਣੀ ਦੀ ਕਿੱਲਤ ਨਾਲ ਜੂਝ ਰਹੇ ਹਨ। ਕਿਸੇ ਘਰ ਅੰਦਰ ਵੀ ਟੁੱਲੂ ਪੰਪ ਤੋਂ ਬਿਨਾਂ ਪਾਣੀ ਦੀ ਬੂੰਦ ਵੀ ਨਹੀਂ ਪਹੁੰਚਦੀ। ਲੋਟਾ ਨੇ ਕਿਹਾ ਕਿ ਮੇਰੀ ਪਹਿਲੀ ਕੋਸ਼ਿਸ਼ ਹੀ ਵਾਰਡ ਵਾਸੀਆਂ ਨੂੰ ਪਾਣੀ ਦੀ ਕਿੱਲਤ ਨੂੰ ਦੂਰ ਕਰਨ ਲਈ, ਨਵਾਂ ਟਿਊਬਵੈਲ ਲਵਾਉਣ ਦੀ ਹੋਵੇਗੀ। ਉਨਾਂ ਲੋਕਾਂ ਨੂੰ ਭਰੋਸਾ ਦਿੱਤਾ ਕਿ ਇਲਾਕੇ ਦੀਆਂ ਸਾਰੀਆਂ ਸਮੱਸਿਆਵਾਂ ਨੂੰ ਦੂਰ ਕਰਨਾ ਹੀ ਮੇਰਾ ਇੱਕੋ-ਇੱਕ ਟੀਚਾ ਹੈ। ਉਨਾਂ ਲੋਕਾਂ ਨੂੰ ਕਿਹਾ ਕਿ ਤੁਸੀਂ ਸਾਰੇ ਜਾਣਦੇ ਹੋ ਕਿ ਕੂੜੇ ਦੇ ਡੰਪ ਦੀ ਸਮੱਸਿਆ ਦਾ ਹੱਲ ਵਾਰਡ ਵਾਸੀਆਂ ਦੀ ਮੰਗ ਮੁਤਾਬਿਕ ਆਪਾਂ ਰਲ ਮਿਲ ਕੇ ਕੀਤਾ ਹੈ। ਪਰੰਤੂ ਕੁਝ ਅਜਿਹੇ ਲੀਡਰ ਵੀ ਹਨ, ਜਿਹੜੇ ਕੂੜੇ ਦਾ ਡੰਪ ਚੁਕਵਾਉਣ ਲਈ ਆਪਣੀਆਂ ਫੋਟੋਆਂ ਸੂਚਨਾ ਬੋਰਡ ਦੇ ਕੋਲ ਖਿਚਵਾ ਕੇ ਲੋਕਾਂ ਨੂੰ ਗੁੰਮਰਾਹ ਕਰਨ ਦੀਆਂ ਕੋਸ਼ਿਸ਼ਾਂ ਵੀ ਕਰ ਚੁੱਕੇ ਹਨ। ਉਨਾਂ ਲੋਕਾਂ ਨੂੰ ਅਪੀਲ ਕੀਤੀ ਕਿ ਵਾਰਡ ਵਿੱਚੋਂ ਵੱਡੀ ਲੀਡ ਤੇ ਜਿੱਤ ਦਿਵਾ ਕੇ ਉਸ ਨੂੰ ਵਾਰਡ ਦੀ ਨੁਮਾਇੰਦਗੀ ਕਰਨ ਦਾ ਮੌਕਾ ਦਿਊਗੇ ਤਾਂ ਤੁਹਾਨੂੰ ਹਮੇਸ਼ਾ ਆਪਣੀ ਵੋਟ ਪਾਈ ਤੇ ਮਾਣ ਮਹਿਸੂੁਸ ਹੁੰਦਾ ਰਹੇਗਾ। ਇਸ ਮੌਕੇ ਵੱਡੀ ਗਿਣਤੀ ਵਿੱਚ ਮੁਹੱਲਾ ਵਾਸੀ ਵੀ ਮੌਜੂਦ ਰਹੇ।
