ਹਰਿੰਦਰ ਨਿੱਕਾ, ਬਰਨਾਲਾ 2 ਫਰਵਰੀ 2024
ਬਠਿੰਡਾ ਜਿਲ੍ਹੇ ਦੇ ਮੌੜ ਮੰਡੀ ਇਲਾਕੇ ‘ਚੋਂ ਆਈ.20 ਕਾਰ ਖੋਹਕੇ ਭੱਜੇ ਦੋ ਲੁਟੇਰਿਆਂ ਨੂੰ ਤਪਾ ਪੁਲਿਸ ਨੇ ਚੋਰੀ ਕੀਤੀ ਕਾਰ ਸਣੇ ਦਬੋਚ ਲਿਆ। ਦੋਸ਼ੀਆਂ ਖਿਲਾਫ ਪੁਲਿਸ ਨੇ ਕੇਸ ਦਰਜ ਕਰਕੇ,ਉਨ੍ਹਾਂ ਤੋਂ ਹੋਰ ਸਖਤੀ ਨਾਲ ਪੁੱਛਗਿੱਛ ਸ਼ੁਰੂ ਕਰ ਦਿੱਤੀ। ਦਰਜ ਮੁਕੱਦਮਾ ਅਨੁਸਾਰ ਥਾਣਾ ਤਪਾ ‘ਚ ਤਾਇਨਾਤ ਸ:ਥ: ਸੰਤੋਖ ਸਿੰਘ ਦੀ ਅਗਵਾਈ ਵਿੱਚ ਪੁਲਿਸ ਪਾਰਟੀ ਨੂੰ ਮੁਖਬਰ ਨੇ ਇਤਲਾਹ ਦਿੱਤੀ ਕਿ ਗੁਰਪ੍ਰੀਤ ਸਿੰਘ ਉਰਫ ਵਿੱਕੀ ਪੁੱਤਰ ਕ੍ਰਿਸਨ ਸਿੰਘ ਵਾਸੀ ਤਾਜੋਕੇ ਅਤੇ ਹਰਜੀਤ ਸਿੰਘ ਉਰਫ ਹਰਜੀਤਾ ਪੁੱਤਰ ਭੋਲਾ ਸਿੰਘ ਵਾਸੀ ਘੜੈਲੀ, ਜਿੰਨ੍ਹਾਂ ਨੇ ਇੱਕ ਕਾਰ ਨੰਬਰ ਪੀਬੀ-03-ਏਐਨ-7971 ਮਾਰਕਾ ਆਈ-20 ਰੰਗ ਚਿੱਟਾ ਮੌੜ ਮੰਡੀ, ਜਿਲਾ ਬਠਿੰਡਾ ਤੋਂ ਖੋਹ ਕੇ ਲਿਆਦੀ ਹੈ। ਇਹ ਦੋਵੇਂ ਲੁਟੇਰਿਆਂ ਨੇ ਖੋਹ ਕੀਤੀ ਕਾਰ ਦੀਆਂ ਦੋਵੇਂ ਨੰਬਰ ਪਲੇਟਾਂ ਪੱਟੀਆ ਹੋਈਆ ਹਨ । ਇਹ ਦੋਵੇਂ ਜਣੇ ਖੋਹ ਕੀਤੀ ਹੋਈ ਕਾਰ ਨੂੰ ਵੇਚਣ ਦੀ ਤਾਕ ਵਿੱਚ ਆਲੀਕੇ ਰੋਡ ਤਪਾ ਵਿਖੇ ਘੁੰਮਦੇ ਵੇਖੇ ਗਏ ਹਨ। ਪੁਲਿਸ ਵੱਲੋਂ ਮੁਖਬਰੀ ਦੇ ਅਧਾਰ ਪਰ ਦੋਵਾਂ ਦੋਸੀਆਂ ਖਿਲਾਫ ਮੁਕੱਦਮਾ ਦਰਜ ਰਜਿਸਟਰ ਕੀਤਾ ਗਿਆ। ਐਸਐਚਓ ਲਖਵਿੰਦਰ ਸਿੰਘ ਨੇ ਦੱਸਿਆ ਕਿ ਪੁਲਿਸ ਪਾਰਟੀ ਨੇ ਦੋਵਾਂ ਹੀ ਦੋਸ਼ੀਆਂ ਨੂੰ ਗਿਰਫਤਾਰ ਕਰਕੇ, ਉਨਾਂ ਦੇ ਕਬਜੇ ਵਿੱਚੋਂ ਖੋਹੀ ਹੋਈ ਕਾਰ ਬਰਾਮਦ ਕਰ ਲਈ ਹੈ। ਕਾਰ ਦੀ ਬਾਜਾਰੀ ਕੀਮਤ 4,50,000/-ਰੁਪਏ ਦੱਸੀ ਜਾ ਰਹੀ ਹੈ। ਐਸਐਚਓ ਲਖਵਿੰਦਰ ਸਿੰਘ ਨੇ ਕਿਹਾ ਕਿ ਦੋਸ਼ੀਆਂ ਤੋਂ ਪੁੱਛਗਿੱਛ ਜ਼ਾਰੀ ਹੈ,ਉਨ੍ਹਾਂ ਤੋਂ ਚੋਰੀ ਦੀਆਂ ਹੋਰ ਘਟਨਾਵਾਂ ਸਬੰਧੀ ਖੁਲਾਸੇ ਹੋਣ ਦੀ ਵੀ ਸੰਭਾਾਵਨਾ ਹੈ।
