ਸੰਯੁਕਤ ਕਿਸਾਨ ਮੋਰਚਾ: ਧਰਨੇ ਦਾ 437ਵਾਂ ਦਿਨ
- ਬੇਰੁਜ਼ਗਾਰ ਅਧਿਆਪਕਾਂ ‘ਤੇ ਵਹਿਸ਼ੀ ਲਾਠੀਚਾਰਜ ਦੀ ਸਖਤ ਨਿਖੇਧੀ; ਸਬੰਧਿਤ ਡੀਐਸਪੀ ‘ਤੇ ਕੇਸ ਦਰਜ ਕਰਨ ਤੇ ਮੁਅੱਤਲ ਕਰਨ ਦੀ ਮੰਗ।
- ਮੋਰਚਾ ਫਤਹਿ ਕਰ ਵਾਪਸ ਆ ਰਹੇ ਯੋਧਿਆਂ ਦੇ ਹਰਿਆਣਾ ‘ਚ ਭਰਵੇਂ ਸਵਾਗਤ ਦੀਆਂ ਖਬਰਾਂ ਨੇ ਧਰਨੇ ਦਾ ਮਾਹੌਲ ਗਰਮਾਇਆ।
- ਦਿੱਲੀ ਪਰਤਣ ਵਾਲੇ ਯੋਧਿਆਂ ਦੇ ਸਵਾਗਤ ਦੀਆਂ ਤਿਆਰੀਆਂ ਮੁਕੰਮਲ; ਕੱਲ੍ਹ ਹੰਢਿਆਇਆ ਵਿਖੇ ਸ਼ਾਮ ਤਿੰਨ ਵਜੇ ਹੋਵੇਗਾ ਭਰਵਾਂ ਸਵਾਗਤ।
- ਅੰਦੋਲਨ ਦੀਆਂ ਯਾਦਾਂ ਸਾਂਭਣ ਲੱਗੇ ਧਰਨਾਕਾਰੀ; ਫੋਟੋਆਂ ਖਿੱਚਵਾਉਣ ਲਈ ਭਾਰੀ ਉਤਸ਼ਾਹ।
ਰਵੀ ਸੈਣ,ਬਰਨਾਲਾ: 11 ਦਸੰਬਰ, 2021
ਸਰਕਾਰ ਵੱਲੋਂ ਮੰਗਾਂ ਮੰਨ ਲਏ ਜਾਣ ਅਤੇ ਸੰਯਕਤ ਕਿਸਾਨ ਮੋਰਚੇ ਵੱਲੋਂ ਅੰਦੋਲਨ ਨੂੰ ਮੁਅੱਤਲ ਕੀਤੇ ਜਾਣ ਬਾਅਦ ਦੇ ਫੈਸਲੇ ਤੋਂ ਬਾਅਦ ਰੇਲਵੇ ਸਟੇਸ਼ਨ ‘ਤੇ ਲਾਇਆ ਧਰਨਾ ਹੁਣ ਆਪਣੇ ਅੰਤਿਮ ਪੜਾਅ ਵੱਲ ਵਧ ਰਿਹਾ ਹੈ। ਮੋਰਚੇ ਦੀ ਕੌਮੀ ਲੀਡਰਸ਼ਿਪ ਦੇ ਫੈਸਲੇ ਅਨੁਸਾਰ 15 ਦਸੰਬਰ ਇਸ ਧਰਨੇ ਦਾ ਆਖਰੀ ਦਿਨ ਹੋਵੇਗਾ। ਅੱਜ 437 ਵੇਂ ਦਿਨ ਵੀ ਧਰਨਾ ਪੂਰੇ ਜੋਸ਼ੋ-ਖਰੋਸ਼ ਨਾਲ ਜਾਰੀ ਰਿਹਾ। ਅੱਜ ਬੁਲਾਰਿਆਂ ਨੇ ਕੱਲ੍ਹ ਮਾਨਸਾ ਵਿਖੇ ਬੇਰੁਜ਼ਗਾਰ ਅਧਿਆਪਕਾਂ ‘ਤੇ ਵਹਿਸ਼ੀਆਨਾ ਲਾਠੀਚਾਰਜ ਦੀ ਸਖ਼ਤ ਨਿੰਦਾ ਕਰਦਿਆਂ ਕਿਹਾ ਹੈ ਕਿ ਇਸ ਲਾਠੀਚਾਰਜ ਦੀ ਅਗਵਾਈ ਕਰਨ ਵਾਲੇ ਮੁੱਖ ਮੰਤਰੀ ਦੇ ਸੁਰੱਖਿਆ ਅਮਲੇ ਵਿਚਲੇ ਡੀ ਐੱਸ ਪੀ ਵੱਲੋਂ ਸਿਰੇ ਦੀ ਜ਼ਾਲਮਾਨਾ ਬਿਰਤੀ ਦਾ ਮੁਜ਼ਾਹਰਾ ਕੀਤਾ ਗਿਆ ਹੈ। ਮੱਧ ਯੁੱਗੀ ਜਗੀਰੂ ਜ਼ਮਾਨੇ ਵਾਂਗ ਵਹਿਸ਼ੀਆਨਾ ਤਰੀਕੇ ਨਾਲ ਰੁਜ਼ਗਾਰ ਮੰਗਦੇ ਨੌਜਵਾਨਾਂ ਨੂੰ ਜਿਵੇਂ ਕੁਟਾਪਾ ਚਾੜ੍ਹਿਆ ਗਿਆ, ਇਹ ਜ਼ੁਲਮ ਕਿਸੇ ਤਰ੍ਹਾਂ ਵੀ ਬਰਦਾਸ਼ਤ ਕਰਨਯੋਗ ਨਹੀਂ ਹੈ। ਉਨ੍ਹਾਂ ਕਿਹਾ ਕਿ ਡੀ ਐਸ ਪੀ ‘ਤੇ ਕੇਸ ਦਰਜ ਕੀਤਾ ਜਾਵੇ, ਉਸ ਨੂੰ ਨੌਕਰੀ ਤੋਂ ਮੁਅੱਤਲ ਕੀਤਾ ਜਾਵੇ ਤੇ ਮੁੱਖ ਮੰਤਰੀ ਅਜਿਹੇ ਵਿਹਾਰ ਲਈ ਜਨਤਕ ਮੁਆਫ਼ੀ ਮੰਗੇ।
ਅੱਜ ਦਿੱਲੀ ਤੋਂ ਸ਼ੁਰੂ ਹੋਏ ਫਤਹਿ ਮਾਰਚ ਦੀਆਂ ਖਬਰਾਂ ਦਾ ਖੁਸ਼ਨੁਮਾ ਅਸਰ ਬਰਨਾਲਾ ਧਰਨੇ ‘ਚ ਵੀ ਦੇਖਣ ਨੂੰ ਮਿਲਿਆ। ਪੰਜਾਬ ਵੱਲ ਕੂਚ ਕਰਨ ਸਮੇਂ ਦਿੱਲੀ ਦੇ ਬਾਰਡਰਾਂ ਅਤੇ ਹਰਿਆਣਾ ਵਿਚ ਥਾਂ ਥਾਂ ਪੈਂਦੇ ਭੰਗੜੇ, ਗਿੱਧੇ, ਫੁੱਲਾਂ ਦੀ ਬਾਰਿਸ਼, ਲੰਗਰ, ਸਵਾਗਤੀ ਗੇਟ, ਭਰਵੇਂ ਸਵਾਗਤ ,ਆਗੂਆਂ ਦੇ ਗਲਾਂ ‘ਚ ਪੈਂਦੇ ਹਾਰ, ਧਰਨੇ ਵਿੱਚ ਚਰਚਾ ਦਾ ਵਿਸ਼ਾ ਬਣੇ ਰਹੇ। ਆਗੂਆਂ ਜਿੱਥੇ ਇਨ੍ਹਾਂ ਖੁਸ਼ੀਆਂ ਦਾ ਜ਼ਿਕਰ ਕਰਦੇ ਰਹੇ, ਉਥੇ 700 ਸ਼ਹੀਦਾਂ ਦੀਆਂ ਕੁਰਬਾਨੀਆਂ ਦਾ ਵੀ ਜ਼ਿਕਰ ਕਰਨਾ ਵੀ ਨਹੀਂ ਭੁੱਲੇ। ਆਗੂਆਂ ਨੇ ਕਿਹਾ ਕਿ ਇਹ ਜਿੱਤ ਵੱਡੀਆਂ ਕੁਰਬਾਨੀਆਂ ਦੇ ਕੇ ਹਾਸਲ ਕੀਤੀ ਹੈ। ਦਿੱਲੀ,ਹਰਿਆਣਾ ਤੋਂ ਆ ਰਹੀਆਂ ਖਬਰਾਂ ਨੇ ਧਰਨੇ ਦਾ ਮਾਹੌਲ ਨੂੰ ਗਰਮਾਈ ਰੱਖਿਆ।
ਸੰਯੁਕਤ ਕਿਸਾਨ ਮੋਰਚੇ ਦਾ ਦਿੱਲੀ ਦੇ ਟਿਕਰੀ ਬਾਰਡਰ ਚੱਲਿਆ ਫਤਿਹ ਮਾਰਚ ਕੱਲ੍ਹ 12 ਤਰੀਕ ਨੂੰ ਬੁਢਲਾਡਾ ਰਾਹੀਂ ਪੰਜਾਬ ਵਿੱਚ ਦਾਖਲ ਹੋਵੇਗਾ। ਇਸ ਫਤਹਿ ਮਾਰਚ ਦੇ ਭਰਵੇਂ ਸਵਾਗਤ ਲਈ ਤਿਆਰੀਆਂ ਮੁਕੰਮਲ ਕਰ ਲਈਆਂ ਹਨ। ਸੰਯੁਕਤ ਕਿਸਾਨ ਮੋਰਚਾ ਬਰਨਾਲਾ ਵੱਲੋਂ ਇਸ ਫਤਹਿ ਮਾਰਚ ਦਾ ਸਵਾਗਤ ਹੰਢਿਆਇਆ ਵਿਖੇ ਕੀਤਾ ਜਾਵੇਗਾ। ਆਗੂਆਂ ਨੇ ਇਸ ਇਤਿਹਾਸਕ ਮੌਕੇ ਸਭ ਨੂੰ ਹੁੰਮ ਹੁੰਮਾ ਕੇ ਹੰਢਿਆਇਆ ਪਹੁੰਚਣ ਦਾ ਸੱਦਾ ਦਿੱਤਾ।
ਅੱਜ ਧਰਨੇ ਨੂੰ ਬਲਵੰਤ ਸਿੰਘ ਉਪਲੀ, ਕਰਨੈਲ ਸਿੰਘ ਗਾਂਧੀ,ਮੇਲਾ ਸਿੰਘ ਕੱਟੂ, ਨਛੱਤਰ ਸਿੰਘ ਸਾਹੌਰ, ਬਾਬੂ ਸਿੰਘ ਖੁੱਡੀ ਕਲਾਂ,ਜਸਪਾਲ ਕੌਰ,ਪ੍ਰੇਮਪਾਲ ਕੌਰ, ਅਮਰਜੀਤ ਕੌਰ, ਗੁਰਚਰਨ ਸਿੰਘ ਸਰਪੰਚ, ਸਾਹਿਬ ਸਿੰਘ ਬਡਬਰ, ਨੇਕਦਰਸ਼ਨ ਸਿੰਘ,ਪ੍ਰਮਿੰਦਰ ਹੰਢਿਆਇਆ ਨੇ ਸੰਬੋਧਨ ਕੀਤਾ।
ਜਿਉਂ ਜਿਉਂ ਧਰਨੇ ਦੇ ਖਤਮ ਹੋਣ ਦਾ ਦਿਨ ਨਜਦੀਕ ਆ ਰਿਹਾ ਹੈ, ਧਰਨੇ ਦੀਆਂ ਯਾਦਾਂ ਨੂੰ ਸਾਂਭਣ ਦੇ ਯਤਨ ਵੀ ਤੇਜ ਹੋ ਗਏ ਹਨ। ਧਰਨੇ ਵਿੱਚ ਸ਼ਮੂਲੀਅਤ ਦੀ ਸ਼ਾਹਦੀ ਭਰਨ ਵਾਲੀਆਂ ਫੋਟੋਆਂ ਖਿਚਵਾਉਣ ਲਈ ਭਾਰੀ ਉਤਸ਼ਾਹ ਹੈ। ਕਿਸਾਨ ਬੀਬੀਆਂ ਆਪਣੇ ਮਨਪਸੰਦ ਗਰੁੱਪਾਂ ਤੇ ਧਰਨੇ ਦੌਰਾਨ ਬਣੀਆਂ ਸਹੇਲੀਆਂ ਨਾਲ ਫੋਟੋਆਂ ਖਿਚਵਾ ਕੇ ਫਰੇਮ ਕਰਵਾ ਰਹੀਆਂ ਹਨ।
ਅੱਜ ਹੇਮ ਰਾਜ ਠੁੱਲੀਵਾਲ, ਗੁਰਪ੍ਰੀਤ ਸੰਘੇੜਾ, ਸਰਦਾਰਾ ਸਿੰਘ ਮੌੜ ਨੇ ਗੀਤ ਸੁਣਾਏ।
