ਹਰਿੰਦਰ ਨਿੱਕਾ , ਬਰਨਾਲਾ 15 ਮਾਰਚ 2023
ਜਿਲ੍ਹੇ ਦੇ ਪਿੰਡ ਚੀਮਾ ਵਿਖੇ ਨੈਸਨਲ ਹਾਈਵੇ ਤੇ ਬਣੇ ਖੂਨੀ ਕੱਟ ਤੇ ਪ੍ਰਦਰਸ਼ਨਕਾਰੀਆਂ ਵੱਲੋਂ ਜ਼ਾਰੀ ਪੱਕੇ ਮੋਰਚੇ ਦੇ ਟੈਂਟ ਵਿੱਚ ਅੱਜ ਧੰਦ ਕਾਰਣ ਇੱਕ ਸਕਾਰਪੀੳ ਗੱਡੀ ਜਾ ਵੜ੍ਹੀੇ। ਮੋਰਚੇ ਤੇ ਡਟੇ, ਦੋ ਵਿਅਕਤੀ ਵਾਲ ਵਾਲ ਬਚ ਗਏ। ਜਦੋਂਕਿ ਸਕਾਰਪੀੳ ਸਵਾਰ ਵਿਅਕਤੀਆਂ ਦੇ ਵੀ ਜਖਮੀ ਹੋਣ ਬਾਰੇ ਪਤਾ ਲੱਗਿਆ ਹੈ। ਜਿੰਨਾਂ ਨੂੰ ਇਲਾਜ ਲਈ, ਹਸਪਤਾਲ ਲਿਆਂਦਾ ਗਿਆ ਹੈ। ਪਰੰਤੂ ਕਿਸੇ ਹੋਰ ਵੱਡੀ ਦੁਰਘਟਨਾ ਤੋਂ ਵੀ ਬਚਾਅ ਰਹਿ ਗਿਆ। ਪ੍ਰਾਪਤ ਜਾਣਕਾਰੀ ਅਨੁਸਾਰ , ਸਵੇਰੇ ਸਵੱਖਤੇ ਕਰੀਬ ਸੱਤ ਕੁ ਵਜੇ, ਸੰਘਣੀ ਧੁੰਦ ਕਾਰਣ ਬਰਨਾਲਾ ਵਾਲੇ ਪਾਸੇ ਤੋਂ ਇੱਕ ਸਕਾਰਪੀਉ ਗੱਡੀ ਆਈ ਤੇ ਪੱਕੇ ਮੋਰਚੇ ਲਈ ਲੱਗੇ ਟੈਂਟ ਵਿੱਚ ਜਾ ਵੜੀ। ਤੇਜ਼ ਰਫਤਾਰ ਸਕਾਰਪੀਉ ਗੱਡੀ ਨੇ ਕਿਸਾਨਾਂ ਵੱਲੋਂ ਸੁਰੱਖਿਆ ਲਈ ਲਗਾਈਆਂ ਟਰਾਲੀਆਂ ਵੀ ਪਲਟ ਗਈਆਂ । 
ਸਕਾਰਪੀੳ ਗੱਡੀ ਦਾ ਵੀ ਕਾਫੀ ਨੁਕਸਾਨ ਹੋ ਗਿਆ। ਥਾਣਾ ਸਦਰ ਬਰਨਾਲਾ ਦੇ ਐਸ.ਐਚ.ੳ. ਗੁਰਤਾਰ ਸਿੰਘ ਨੇ ਉਕਤ ਹਾਦਸੇ ਦੀ ਪੁਸ਼ਟੀ ਕਰਦਿਆਂ ਕਿਹਾ ਕਿ ਫਿਲਹਾਲ ਹਾਦਸੇ ਕਾਰਣ ਜਖਮੀ ਹੋਣ ਵਾਲੇ ਵਿਅਕਤੀਆਂ ਬਾਰੇ ਸਿਵਲ ਹਸਪਤਾਲ ਵਿੱਚੋਂ ਕੋਈ ਰੁੱਕਾ ਨਹੀਂ ਮਿਲਿਆ ਹੈ। ਰੁੱਕਾ ਮਿਲਣ ਤੋਂ ਬਾਅਦ ਹੀ , ਕੋਈ ਉਚਿਤ ਕਾਨੂੰਨੀ ਕਾਰਵਾਈ ਅਮਲ ਵਿੱਚ ਲਿਆਂਦੀ ਜਾਵੇਗੀ।
