ਧੀਆਂ ਦੀ ਰਾਖੀ ਕਰਨੀ, ਮਾਪਿਆਂ ਨੂੰ ਪੈ ਰਹੀ ਮਹਿੰਗੀ
ਕੁੜੀਆਂ ਨਾਲ ਬਦਤਮੀਜ਼ੀ ਕਰਨ ਵਾਲਿਆਂ ਦੇ ਵਧ ਰਹੇ ਹਨ ਹੌਂਸਲੇ
ਹਰਿੰਦਰ ਨਿੱਕਾ ,ਬਰਨਾਲਾ 31 ਮਾਰਚ 2021
ਗੁੰਡਾਗਰਦੀ ਦੀ ਸੀਸੀਟੀਵੀ ਕੈਮਰੇ ਵਿੱਚ ਕੈਦ ਹੋਈ ਇਹ ਘਟਨਾ ਬਰਨਾਲਾ ਸ਼ਹਿਰ ਦੇ ਜੰਡਾਂ ਵਾਲਾ ਰੋਡ, ਨੇੜੇ ਵਾਲਮੀਕਿ ਮੰਦਿਰ ਏਰੀਏ ਦੀ ਹੈ। ਵੀਡੀਓ ਵਿੱਚ ਬੇਰਹਿਮੀ ਨਾਲ ਕੀਤੀ ਜਾ ਰਹੀ ਕੁੱਟਮਾਰ ਦੇ ਸ਼ਿਕਾਰ ਡਿੰਪਲ ਨੇ ਦੱਸਿਆ ਕਿ ਦੋਸ਼ੀ ਸ਼ਕਤੀ ਕਾਫੀ ਸਮੇਂ ਤੋਂ ਉਸ ਦੀ ਨਾਭਾ ਵਿਖੇ ਰਹਿੰਦੀ ਭਾਣਜੀ ਨੂੰ ਫੋਨ ਕਰਕੇ ਤੰਗ ਕਰਦਾ ਆ ਰਿਹਾ ਸੀ।
ਅਜਿਹਾ ਕਰਨ ਤੋਂ ਰੋਕਣ ਲਈ, ਜਦੋਂ ਸ਼ਕਤੀ ਨੂੰ ਰੋਕਿਆ ਗਿਆ ਤਾਂ ਉਹ ਆਪਣੇ ਹੋਰ ਸਾਥੀਆਂ ਸਮੇਤ ਉਸ ਦੇ ਘਰ ਅੱਗੇ ਹਜੂਮ ਦੇ ਰੂਪ ਵਿੱਚ ਪਹੁੰਚ ਗਏ। ਇੱਕ ਵਿਅਕਤੀ ਨੇ ਉਸ ਨੂੰ ਬਾਹਰ ਬੁਲਾਇਆ ਤਾਂ ਬਾਕੀਆਂ ਨੇ ਉਸ ਨੂੰ ਛੱਲੀਆਂ ਵਾਂਗੂ ਕੁੱਟਣਾ ਸ਼ੁਰੂ ਕਰ ਦਿੱਤਾ। ਮਾਰਤਾ ਮਾਰਤਾ ਦਾ ਰੌਲਾ ਪਾਉਣ ਤੇ ਸਾਰੇ ਦੋਸ਼ੀ ਉਸਨੂੰ ਫਿਰ ਜਾਨ ਤੋਂ ਮਾਰ ਦੇਣ ਦੀਆਂ ਧਮਕੀਆਂ ਦਿੰਦੇ ਮੌਕੇ ਤੋਂ ਫਰਾਰ ਹੋ ਗਏ। 
ਤਫਤੀਸ਼ ਅਧਿਕਾਰੀ ਏਐਸਆਈ ਸਤਵਿੰਦਰ ਪਾਲ ਨੇ ਦੱਸਿਆ ਕਿ ਹਸਪਤਾਲ ਵਿਖੇ ਭਰਤੀ ਡਿੰਪਲ ਦੇ ਬਿਆਨ ਅਤੇ ਮੈਡੀਕਲ ਰਿਪੋਰਟ ਦੇ ਅਧਾਰ ਤੇ ਨਾਮਜਦ ਦੋਸ਼ੀਆਂ ਤੇ ਕੁਝ ਹੋਰ ਅਣਪਛਾਤਿਆਂ ਦੇ ਖਿਲਾਫ ਕੇਸ ਦਰਜ ਕਰਕੇ, ਉਨ੍ਹਾਂ ਦੀ ਤਲਾਸ਼ ਸ਼ੁਰੂ ਕਰ ਦਿੱਤੀ ਹੈ। ਜਲਦ ਹੀ ਦੋਸ਼ੀ ਕਾਬੂ ਕਰ ਲਏ ਜਾਣਗੇ। ਉਨ੍ਹਾਂ ਕਿਹਾ ਕਿ ਗੁੰਡਾਗਰਦੀ ਕਰਨ ਵਾਲਿਆਂ ਨੂੰ ਸਖਤੀ ਨਾਲ ਨੱਥ ਪਾਵਾਂਗੇ।
